ह्युमतया सरस्वति निकेतन स्कूलया ग्वाहालिया निंतिं कला ब्वज्या

येँ – ह्युमतय् च्वंगु सरस्वती निकेतन माध्यमिक विद्यालयया ग्वाहालिया निंतिं जूगु कला ब्वज्याय् छन्हुं हे प्यंगू लाख तका बराबरया चित्र मिउगु दु ।
स्कूलया ग्वाहालिया निंतिं द होप एक्जिविसन अफ प्लानिंग फर चिल्ड्रेन नामं नेपाल आर्ट काउन्सिल बबरमहलय् थ्व ब्वज्या जुयाच्वंगु खः ।

ब्वज्याय् वरिष्ठ कलाकारपिं गोविन्द डंगोल, शंकरराज सिंह, लोक चित्रकार, नरेश सैंजु, विक्रम शाह व जीवनराज उपाध्याय लिसें ९० म्ह कलाकारतय् सछिगू स्वयां अप्वः चित्र तयातःगु खः । परम्परागत व धार्मिक सम्पदा लिसे स्वाःगु चित्र लिसें समसामयिक चित्रत ब्वज्याय् तयातःगु दु । थ्व ब्वज्या वइगु चैत २८ गते तक जुइ ।

येँ महानगरपालिकाया मेयर विद्या सुन्दर शाक्यं उलेज्या यानादीगु थ्व ब्वज्या सरस्वति निकेतन माविया विद्यार्थीपिंत न्हिनय् टिफिन नकेगु निंतिं अक्षयकोष स्थापना यायेत जुयाच्वंगु खः ।