ठाकुर व महतो आः साधारण दुजः जक

येँ -जनता समाजवादी पार्टीं मेम्ह अध्यक्ष महन्थ ठाकुर व वरिष्ठ नेता राजेन्द्र महतोयात साधारण दुजःया रुपय् जक लिकुंका बिउगु दु । जसपा केन्द्रीय कमिटीयात अध्यावधिक यासें ठाकुर व महतोयात साधारण दुजः पदय् कायम याःगु खः ।

जसपां निर्वाचन आयोगय् ५१५ म्ह केन्द्रीय दुजःया नांधालः छ्वःगु दु । उगु नांधलखय् ठाकुर पक्षया आपालं धइथें केन्द्रीय दुजःपिनिगु नां दुथ्याका तःगु मदु । जसपाया छम्ह नेताया कथं केन्द्रीय दुजःया धलखय् उपेन्द्र यादवया तत्कालीन समाजवादी पार्टी नेपालया प्यसःम्हेसिया नां दुथ्याकातःगु दुसा ११५ म्ह ठाकुर नेतृत्वया तत्कालीन राजपा व मेगु दलं वःपिनिगु नां दुथ्याकातःगु दु ।

जसपा एकीकरण जूगु इलय् ७७९ म्हेसिया केन्द्रीय कार्यकारिणी समिति दयेकूगु खःसा आः उकियात अध्यावधिक यानाः ५१५ म्ह दुने लिकुंकूगु खः । पुलांगु केन्द्रीय कमिटीपाखें २२८ म्हेसित चीकूगु दु ।

निगू पुचःया विवाद ज्यंकेगु झ्वलय् निर्वाचन आयोगं यादव पक्षयात आधिकारिकता बियाः ठाकुरयात न्हूगु पार्टी चायेकेत धाःगु खःसा ठाकुर पक्षं निर्वाचन आयोगयात निर्णययात हाथ्या बियाः सर्वोच्च अदालतय् रिट दायर याःगु खः ।