हानं पिदन सभामुखया विवाद

येँ – संसदया अधिवेशन न्ह्यायेवं सभामुख सुयात दयेकेगु धइगु बारे नेपाल कम्यनिष्ट पार्टी (नेकपा) दुने विवाद नं तच्वया वंगु दु । पूर्व माओवादीपाखें थ्व स्वयां न्ह्यः नं सभामुख थःगु पक्षयाम्ह जूगुलिं आः नं थःगु हे पक्षयाम्ह जुइमाः धकाः हानं दावी याना हःगु दु । पूर्व एमालें धाःसा पार्टी एकीकरण जुइधुंकूगुलिं आः माओवादी व एमाले धायेगु आवश्यकता मदु धासें पुलांम्ह सभामुख सुवास नेम्वाङयात हे हानं सभामुख दयेकेगु प्रस्ताव न्ह्यःने हयाच्वंगु दु ।

नेकपा स्थायी कमिटीया दुजः देवेन्द्र पौडेलं सभामुख पूर्व माओवादीयाम्ह हे जुइमाः धासें दाबी मत्वतेग ुखँ धयाच्वंगु दु । पूर्व माओवादीया हे मेम्ह नेता देव गुरुङं धाःसा सभामुखय् नेम्वाङ मखुसा थःत बीमाः धकाः दावी याना हयाच्वंगु दु । थुकिं यानाः नेकपा दुने सभामुख सुयात दयेकेगु धइगु खँय् झन समस्या जुयाच्वंगु खँ सूत्रं धाःगु दु । मेखे प्रधानमन्त्री केपी शर्मा ओली धाःसा आः संसद न्ह्याकेगु खँय् अप्वः जटिलता वये फइ धासें पुलांम्ह सभामुख नेम्वाङयात हे निरन्तरता बीमाःगु पक्षय् वनाच्वंगु दु । पार्टीया मेम्ह अध्यक्ष पुष्पकमल दाहाल धाःसा थःगु पक्षयाम्ह सभामुख जुइमाः धासें जनार्दन शर्माया नां न्ह्यःने तयेगु यानाच्वंगु दु ।

मेखे उपसभामुख शिवमाया तुम्बाहाम्फें थःत सभामुख मदयेकेगु खःसा गुगुं हालतय् उपसभामुखं राजीनामा मबीगु अडान कयाच्वंगुलिं सभामुख ल्ययेगु निंतिं नेकपा दुने तःधंगु समस्या खने दया वयाच्वंगु खँ सूत्रं धाःगु दु । सूत्रया कथं पार्टी दुने थीथी गुटपाखें सभामुखया निंतिं दवाव अप्वया वनाच्वंगु दुसां नं नेतृत्वं उकियात कयाः निर्णय यायेत तकं समस्या जुयाच्वंगु दु । पौडेलया कथं सभामुख थःगु पक्षय् वयेमाः, उकिया निंतिं थःपिंसं अग्नि सापकोटयात न्ह्यःने हयागु खः धकाः धयादी ।

पार्टीया दुने भागबन्डा विवाद तच्वया वंसां नं पुलांम्ह सभामुखया सम्भावना धाःसा अप्वया वनाच्वंगु खँ धाःगु दु । प्रम ओली गुगुं नं हालतय् नेम्वाङयात सभामुख दयेकेगु कथं तयारी यानाच्वंगु खँ धाःगु दु । तर पार्टीया मेपिं वरिष्ठ नेता माधवकुमार नेपाल व झलनाथ खनालया समर्थन नं आवश्यक जूगुलिं ओलीया कुतः सफल मजुइगु अनुमान नं जुयाच्वंगु दु ।

छगू हे पार्टीया सभामुख व उपसभामुख जुइ मदइगु संवैधानिक प्रावधानया कारणं उपसभामुख तुम्बाहाम्फे नं सभामुख जुइ फइगु सम्भावना दुसां नं उकियात पार्टीं धाःसा स्वीकार याये फयाच्वंगु मदुसा तुम्बाहाम्फे नं थःगु पद त्वःते न्ह्यः मेगु अज्याःगु छुं पद मदइगु खःसा उपसभामुखं राजीनामा मबीगु सोच दयेकाच्वंगु खँ सूत्रं धाःगु दु ।