सिंहदरवारया फोहोर मुना यंकेगु शुरु

येँ (नेपालभाषा टाइम्स)÷येँ महानगरपालिकां म्हिगःनिसें सिंह दरवारया फोहोर मुना यंकेगु शुरु याःगु दु । वंगु झिंन्यान्हु न्ह्यः मनपाया मेयर बोलन साहं सिंहदरवारया फोहोर मुनेगु बन्द याःगु खः ।

मनपाया थ्व पलाःया विरुद्ध सर्वोच्च अदालतय् मुद्दा लायेवं सर्वोच्चं स्वन्हुया दुने सिंहदरवारया फोहोर मुना यंकी धकाः आदेश बिउगु खःसा वहे आदेशया पालना यासें म्हिगःनिसें फोहोर मुनेगु शुरु याःगु खः ।

मनपां फोहोर मुनेगु बन्द याःगुलिं सिंहदरवारय् पिहां वइगु फोहोर सिंहदरवार दुने हे व्यवस्थित यायेगु धकाः गाः म्हुयाः तयारी समेत याये धुंकूगु खः । फोहोर मुनेगु ज्या शुरु जुइधुंकाः मेयर बालेन साहं म्हिगः हे सामाजिक सञ्जालय् छगू स्टाटस च्वसें सर्वोच्चया आदेश मनपां ला पालना यात, आः संघीय सरकार लगायतया निकायतय्सं नं पालना यायेमाल धकाः इनाप यानादीगु दु ।