चुनाव लिपा माओवादी–नेकपा एस एकीकरण
येँ (नेपालभाषा टाइम्स)- नेपाल समाजवादी पार्टीया अध्यक्ष डा. बाबुराम भट्टराईं बृहत् अग्रगामी राजनीतिक शक्तिततय् ध्रुवीकरणया नितिं माओवादी केन्द्र लिसे सहकार्य यायेमाःगु खँ धयादीगु दु । माओवादी केन्द्रीय ज्याकू पेरिसडाँडाय् म्हिगः निगू पार्टीया शीर्ष नेतातय् दथुइ जूगु सहलह लिपा पत्रकारतलिसे खँ ल्हासें डा. भट्टराईं उगु खँ धयादीगु खः ।
उकथं हे गठबन्धनया मापदण्ड कथं वइगु चुनावय् तालमेल जुइ धासें वय्कलं धयादिल, ‘जिपिं नं गठबन्धनया छगू अंग खः, गठबन्धनया गुगु मापदण्ड दयेकी, वहे कथं जुइ ।’ म्हिगः जूगु सहलहया झ्वलय् माओवादी केन्द्रया अध्यक्ष पुष्पकमल दाहाल, उपाध्यक्ष नारायणकाजी श्रेष्ठ, नेसपापाखें अध्यक्ष भट्टराई व मेम्ह अध्यक्ष महिन्द्रराय यादवं ब्वति काःगु खः ।
मेखे माओवादी अध्यक्ष दाहालं नेकपा (एकीकृत समाजवादी) लिसे एकता संयोजन समिति दयेकेगु कुतः जुयाच्वंगु जानकारी बियादीगु दु । अध्यक्ष दाहालं वामपन्थी दलतलिसे बृहत् एकताया नितिं एकीकृत समाजवादीलिसे एकता संयोजन समिति दयेकेगु कुतः जुयाच्वंगु खँ धयादीगु खः ।
दाहालं आःया नितिं छगू हे चुनाव चिं व मंकाः घोषणा पौ ज्वनाः चुनावय् वनेगु व चुनाव लिपा पार्टी एकता यायेगु सहमति जुइधुंकूगु खँ कनादीगु दु । भट्टराई पक्षं ‘नेकपा’ व ‘माओवादी’ शब्दय् असहमति क्यंगु खँय् दाहालं धयादिल, ‘पार्टी एकता लिपा नं नां नेपाल कम्युनिष्ट पार्टी हे जुइ, चुनाव न्ह्यः छुं हे जुइ मखु, चुनाव लिपा नां नेकपा समाजवादी वा मेगु छुं जुइफु, निर्णय मजूगुलिं आः हे धायेफइगु अवस्था मदु, नेकपाय् जिमि दथुइ सहमति जुइधुंकूगु दु ।’
माओवादी केन्द्र व नेसपा दथुइ छगू हे चिं कयाः चुनाव ल्वायेगु सहमति जुइधुंकूगु दुसा म्हिगः हे निर्वाचन आयोगय् छगू हे चुनाव चिं छ्यलाः निर्वाचनय् वनेगु कथं निवेदन नं बिउगु दु । आः वइगु निर्वाचनय् नेसपां माओवादी केन्द्रया चुनाव चिं इंचा मुगः चुनाव चिं
छ्यलीगु जूगु दु ।
उकथं हे नेकपा एकता राष्ट्रिय अभियानया संयोजक बामदेव गौतमं नं माओवादी केन्द्रया चुनाव चिं कयाः निर्वाचनय् उम्मेदवार जुइगु सहमति याःगु दु । तर थः माओवादी केन्द्रया चुनाव चिं कयाः निर्वाचनय् वंसां नं थः गठबन्धनया प्रतिनिधि धाःसा मजुइगु खँ नेता गौतमं धयादीगु दु । नेता गौतमं चुनाव न्ह्यः हे वाम एकता यायेगु कुतः नं याना च्वनादीगु दु ।
LEAVE YOUR COMMENTS