ने. सं. ११४४ कौलाथ्व तृतीया -

नेपालं कुवेतयात ३४ रनं बुकल

एजेन्सी- मलेसियाय् जुयाच्वंगु प्यंगू देय् दथुइया मिस्तय् टी–२० सिरिजय् नेपालं थःगु निगूगु कासा नं त्याकूगु दु । मलेसियाया बायोमास ओभलय् बुधवाः जूगु कासाय् नेपालं कुवेतयात ३४ रनं बुकूगु खः ।

कासाय् न्हापा ब्याटिङ् याःगु नेपालं बांलाःगु प्रर्दशन याये मफुत । निर्धारित २० ओभरय् नेपालं च्यागू विकेटया क्षतिइ मुक्क ८९ रन जक दयेकूगु खः । नेपाःया निंतिं ईन्दु वर्मां दकलय् अप्वः २३ रन दयेकूगु खःसा विन्दु रावलं २० व काजल श्रेष्ठं १९ रन दयेकल । नेपाःया ओपनर पुजा महत्तो डक आउट जुल । सीताराना मगरं १२ रन, कप्तान रुविना क्षेत्रीं ५ रन व सम्झना खड्कां १ रन दयेकूगु खः । कुवेतया महियम हैदरं नेपाःया प्यंगू विकेट काःगु खः ।

नेपालं बिउगु ९० रनया सामान्य लक्ष्य ज्वनाः मैदानय् वःगु कुवेतं निर्धारित २० ओभरय् च्यागू विकेटया क्षतिइ मुक्कं ५४ रन जक दयेकल । कुवेतया जिफा जिलानीं ११ व खादिजा खलिलं १० रन दयेकूगु बाहेक मेपिं सुं नं कासामितय्स दोहरो अंकया रन दयेकेमफुत । नेपाःया निंतिं इन्दु वर्मां प्यंगू ओभर बलिङयासे १० रनया बियाः स्वंगू विकेट काःगु खः । नेपाःया निंतिं डेब्यु याःम्ह कासामि खुशी डंगोलं स्वंगू ओभर बलिङ यासें निगू मेडनसहित मुक्कं ३ रन जक बियाः निगू विकेट काःगु खः । अथेहे ईश्वरी विष्ट, कविता कुँवर व सीताराना मगरं छगू छगू विकेट काःगु खः ।

नेपालं थःगु न्हापांगु कासाय् हंङकंगयात खुगू विकेटं बुकूगु खः । आः नेपालं मेगु कासा मलेसियालिसे शुक्रवाः म्हिती । प्यंगू देय् दथुइ जुयाच्वंगु सिरिजय् नेपाः शीर्ष थासय् दु । थ्व सिरिज क्वचायेधुकाः नेपालं मलेसियाय् जुइगु आइसिसी मिसा टी–२० विश्वकप एसिया छनोट म्हिती । एसिया छनोटय् शीर्ष निगू टिमं ग्लोबल छनोट म्हिती ।