थाैं ब्राजिल व जर्मनीयात अःपुपिं प्रतिस्पर्धी
येँ – विश्वकपय् थौं ब्राजिलं स्वीट्जल्यान्ड लिसे, जर्मनीं मेक्सिकोलिसे व कोस्टारिकां सर्विया लिसे म्हिते त्यंगु दु । ब्राजिलं समूह ई अन्तर्गत थौं स्वीट्जरल्यान्डलिसे म्हितेत्यंगु खः । थ्व निगू टिम दथुइ विश्वकपय् आःतक छगू हे जक कासा जूगु दु । सन् १९५० य् ब्राजिलय् हे जूगु विश्वकपय् म्हितूगु खः, गुगु कासा २–२ गोलया बराबरीइ क्वचाःगु खः ।
न्याक्वः तक विश्वकप त्याकेधुंकूगु ब्राजिल थुगु विश्वकपया नं प्रवल दावेदार खः । थुगुसीया विश्वकपया निंतिं दकलय् न्हापां छनोट चरण पार याःगु ब्राजिलया टिमय् नेयमार थेंज्याःपिं स्टार कासामिं जायाच्वंगु दु ।
ब्राजिलविरुद्धया न्हापांगु कासाय् स्वीस टिमं कडा प्रतिस्पर्धा याइगु जुइ । उकिं नेयमार, ग्राबियल जेसस, फिलिप कोउन्टिन्हो, विलियनपिंसं गोलया निंतिं तसकं धैर्य यायेमालीगु खनेदु । मेखे विश्वकपया वार्मअप कासाय् स्पेनलिसे १–१या बराबरी व जापानयात २–० गोलं बुकाः वःगु स्वीट्जरल्यान्ड पूवंक आत्मविश्वाससाथ म्हितीगु जुइ ।
मेखे लुझनिक रंगशालाय् मेक्सिको विरुद्ध न्हापांगु कासा म्हितेगु झ्वलय् जर्मन टिम विश्वकप उपाधी रक्षा यायेगु ताःतुनाः कुहां वइगु जुइ । अथे नं मेक्सिको विरुद्ध जर्मनी रेकर्ड बांलाःगु हे दु । थीथी धेंधेंबल्लाखय् थुपिं निगू टिम दथुइ झिंस्वक्वः जूगु कासाय् खुक्वः जर्मन त्याःगु दुसा छक्वः जक मेक्सिको त्याःगु दु । ल्यंगु दुगु खुक्वः बराबरीइ क्वचाःगु खः ।
जर्मनी टिमय् वंगु विश्वकपया उत्कृष्ट गोलकिपर म्यानुअल नुयुर लिहां वयेधुंकूगु दु । प्यक्वः तक विश्वकप त्याकेधुंकूगु जर्मनी थुगुसीया नं प्रवल दावेदार खः । मेखे मेक्सिकाें आःतक विश्वकपया खुगू संस्करण जक म्हितेधुंकूगु दुसा थ्व फुक्कलय् नं अन्तिम झिंखुगूया चरण पार यायेमफुगु टिम खः । थ्व ल्याखं थौंया कासाय् जर्मन टिम हे हावी जुइगु खनेदु ।
LEAVE YOUR COMMENTS