एअरपोर्टया करोडौं दां म्हये मफु

विदेशी विमान कम्पनीलिसे कर्मचारी मिलोमतोया लिच्वः

येँ – नागरिक उड्डयन प्राधिकरणया कर्मचारीतय् कारणं विदेशी विमान कम्पनीतय्पाखें वयेमाःगु करोडांै तका दां छखे लाइगु अवस्थाय् थ्यंगु दु । नेपाःया अन्तर्राष्ट्रिय विमानस्थल छ्यःगु वापत प्राधिकरणं विदेशी विमान कम्पनीपाखें करोडौं तका काये ल्यं दनि, तर कर्मचारीतय्सं थज्याःगु कम्पनीत लिसे मिलोमतो यानाः ध्यबा म्हयेगु ज्याय् बेवास्ता याःगुलिं करोडौं तका दां छखे लाइगु अवस्था थ्यनाच्वंगु खः ।

मलेसियाया एयर एसियायाके जक विमानस्थल छ्यःगु वापत प्राधिकरणं झिंस्वंगू करोड तका म्हये ल्यं दनि । एयर एसियां धाःसा ध्यबा हे मपुसे नेपालय् उडान बन्द यायेधुंकूगु दु । निवाः न्ह्यः नेपालय् उडान बन्द याःगु एयर एसियापाखें ध्यबा म्हयेत आः प्राधिकरणपाखें म्वाःमदुगु झमेला यानाच्वनेमाःगु अवस्था वःगु दु ।

प्राधिकरणया विमानस्थल महाप्रबन्धक राजकुमार क्षेत्रीं एयर एशिया लगायत मेमेगु विदेशी विमान कम्पनीपाखें नं ध्यबा म्हयेगु निंतिं आः अन्तर्राष्ट्रिय रुपं हे पहल यायेत्यनागु खँ धयादीगु दु । महाप्रबन्धक क्षेत्रीं बीबीसी लिसे खँ ल्हासें धयादीगु दु, ‘अन्तर्राष्ट्रिय रुपं छुं छुं अज्याःगु संस्था लगायत उगु एयर कम्पनीतलिसे झी नं आवद्ध जुयाच्वनागु दु ।

अज्याःगु संस्थाय् झीसं पौ छ्वल धाःसा उमिसं बाध्य जुयाः हे ध्यबा पुलेमाली ।’छगू इलय् एयर एसियापाखें जक प्राधिकरणं ४१ करोड तका म्हये मालेधुंकूगु खः । आः थ्व कम्पनीं झिंस्वंगू करोड तका मपुसे हे नेपालय् उडान बन्द यानाबिउगु खः ।प्राधिकरणया कथं थथे ध्यबा मपूपिं जक नीगुलिं मल्याक विदेशी एयरलाइन्स कम्पनी दु ।

एयर एसिया धुंकाः दकलय् अप्वः गल्फ एयरपाखें निगू करोड दां म्हये ल्यं दनि ।पर्यटन तथा नागरिक उड्डयन मन्त्रालयं शुल्क उठे यायेगु ज्या लिबाकाच्वंगु सम्बन्धय् कर्मचारीतय्त कारवाही यायेफइगु खँ धाःगु दु । पर्यटन मन्त्रालयया सचिव कृष्ण देवकोटां प्राधिकरणं नियमित रुपं ध्यबा म्हयेगु ज्या मयात धाःसा प्राधिकरणया कर्मचारीतय्त सेवा व शर्तसम्बन्धी कारवाही यायेफइगु खँ धयादीगु दु ।

विदेशी विमान कम्पनी नेपाःया विमानस्थल छ्यःगु वापत जक सरकारं दँय् अर्बौ तका कमे याइ । तर कर्मचारीतय् कमजोरीं यानाः थज्याःगु ध्यबा नं छखे लाइगु अवस्था दु ।

कोरिया व जापान उडानया तयारी

नेपाल वायुसेवा निगमं न्याना हःगु निगः वाइड बडी विमानयात थःगु देशय् ब्वयेके बी न्ह्यः नेपाःया हवाई सुरक्षा सम्बन्धी अध्ययन यायेत नेपाः वयाच्वंगु जापान व कोरियाया विशेषज्ञतय्सं थःगु ज्या यानाच्वंगु दु ।

नेपाःयात युरोपियन युनियनं हवाई प्रतिबन्ध तयातःगु कारणं कोरिया व जापानं नेपाःया विमान ब्वयेके बी न्ह्यः थुकिया परीक्षण यानाच्वंगु दु । उमिगु रिपोर्ट वयेवं नेवानिया वाइड बडी विमानं कोरिया व जापानया उडान याइगु खँ धाःगु दु । निगमं वाइड बडी विमान ब्वयेकेत विदेशं पाइलट हयेगु तयारी नं सिधयेकेधुंकूगु दु ।