सुधारगृह तछ्यानाः कैदी मस्त बिसिउँ वन
येँ (नेपालभाषा टाइम्स)÷सानो थिमिया बाल सुधारगृहय् कुनातःपिं मस्त सुधारगृह तोडफोड यानाः बिसिउँ वनेवं स्वनिगःन्यंकं प्रहरीयात हाइ अलर्ट अवस्थाय् तःगु दु ।
उगु सुधारगृहय् कुनातःम्ह छम्ह कैदी मचा सीगु घटनायात कयाः आक्रोशित जूपिं बन्दी मस्तय्सं सुधारगृह हे तोडफोड यानाः पिने बिसिउँ वंगु खः । सुधारगृहय् कुनातःम्ह रामेछाप मन्थलीया २१ दँ दुम्ह कमल बस्नेत सीवं बाल सुधारगृहया मस्तय्सं नाराबाजी यानाः आक्रोश प्वंकूगु खः । कमल बस्नेत आइतवाः आकाझाकां बेहोश जुइवं वासः याकेत थिमिया हे सिभिल अस्पताल यंकूगु खः । तर अस्पताल थ्यनेवं बस्नेत सित धायेवं वया छेँजःपिंसं सीगुया कारण छु खः धकाः न्ह्यसः तःगु खः । तर अस्पतालं सीगुया कारण कनेगु पलेसा छेँजःपिंत दुव्र्यवहार याःगु खँ धाःगु दु । थुकिं यानाः नं सुधारगृहय् च्वंपिं मस्त तम्वयाः नाराबाजी याःगु खः ।
सुधारगृहया कैदी मस्तय्सं सोमवाः नं नाराबाजी यानाः विरोध याःगु खःसा नाराबाजी यायां उमिसं सुधारगृह दुने तोडफोड नं याःगु खः । उमित नियन्त्रणय् कायेगु लागिं प्रहरीं हवाई फायर समेत याःगु खः । तर कैदी मस्तय्सं प्रहरीयात समेत आक्रमण यानाः सुधारगृहं बिसिउँ वंगु खः । उपिं ल्हातय् कथि व डण्डी ज्वनाः सतकय् पिहां वःगु खः ।
सुधारगृहया लिउनेया खापा तछ्यानाः सछिम्ह स्वयां अप्वः कैदी मस्त बिसिउँ वंगु खः । उगु थासय् २९९ म्ह कैदी मस्त कुनातःगु दु । उकी मध्ये २५६ म्ह मिजंत खः ।
खुँज्या, हत्या, बलात्कार आदि थेंज्याःगु अपराधय् ल्हाः दुपिं १८ दँ क्वय्यापिं मस्तय्त कुने माल धाःसा जेलय् मतसे सुधारगृहय् तइगु खः । बालबालिका सम्बन्धी ऐन कथं १८ दँ क्वय्यापिं मस्तय्त छुं अपराध याःगु सजायँ बी माल धाःसा जेलय् कुने दइ मखु । थज्याःगु सुधारगृह स्वनिगःय ाख्वप लगायत देय्या थीथी च्यागू थासय् चायेकातःगु दु ।
सोमवाः सुधारगृहया खापा तछ्यानाः बिसिउँ वंपिं मध्ये ८७ म्ह मस्तय्त थीथी थासं ज्वना हःगु खः । आः मेपिं नं याकनं ज्वने फइगु खँ धाःगु दु ।
तर थ्व मस्त अपराध कर्मय् लाःपिं जुयाः थुपिं सुधारगृह तछ्यानाः पिहां वःगु खबर वयेवं स्वनिगलय् त्रास थें ब्वलंगु दु । प्रहरी प्रशासनं उमित मालेगु लागिं स्वनिगःया फुक्क थासय् विशेष प्रहरी फोर्स खटे यायेधुंकूगु दु । प्रहरीं बिसिउँ वंपिं फुकसितं ज्वने फइगु खँ धाःगु दु ।
लिसें प्रहरीं आकाझाकां बेहोश जुयाः मदुम्ह कमल बस्नेतया मृत्युया सत्यतथ्य खँ पित हयेगु लागिं छगू छानबिन समिति नं गठन यायेधुंकूगु दु । मदुम्ह बस्नेत छुं ई न्ह्यः तिनि म्हय् पिलो वयाः उसाँय् मदयाच्वंम्ह खः । सुधारगृह दुने च्वंपिं कैदी मस्ततय्सं सुधारगृह दुने स्वास्थ्यया बांलाःगु व्यवस्था मदु धासें उसाँय् मन्त धाःसा उपचार तकं याके मबीगु यानाच्वंगु द्वपं बिउगु दु ।
१८ दँ क्वय्यापिं मस्तय्त कुनीगु सुधारगृह हे तछ्यानाः कैदी मस्त बिसिउँ वंगु थ्व नेपाःया न्हापांगु घटना खः ।
LEAVE YOUR COMMENTS