स्वास्थ्य स्यंसां पद मत्वःतीगु
प्रधानमन्त्रीयात आराम कायेगु सल्लाह, तर..
येँ – स्वास्थ्य स्यनावंगु कारणं यक्वस्यां आरामया सल्लाह बिउसां प्रधानमन्त्री केपी ओलीं धाःसा आः थथें आराम कायेगु बारे छुं बिचाः यानामदीगु खँ सूत्रं धाःगु दु । वय्कलं प्रधानमन्त्री पदय् सुं छम्हेसित कार्यवाहक पदय् तयाः जूसां प्रधानमन्त्री धाःसा थम्हं हे चले यायेगु बिचाः याना च्वनादीगु खँ नं सूत्रं धाःगु दु ।
चिकित्सकतय् सल्लाह कयाः वय्कः याकनं हे स्वास्थ्य उपचारया लागिं ताःई पिहां वनेगु बारे तयारी यानाच्वनादीगु दु । वय्कःया थ्व स्वास्थ्य उपचार विदेशय् जुइगु खँ नं सूत्रं धाःगु दु । तर थ्व गज्याःगु उपचार खः व वय्कः छु देशय् झाइ धइगु खँ धाःसा सी मदुनि । सूत्रतय्सं धाः कथं आः वय्कः स्वास्थ्य उपचारया लागिं अमेरिका झाइगु सम्भावना दु ।
स्वास्थ्य उपचारया लागिं ताःई विदेशय् च्वने मालीगु अवस्थाय् नं वय्कलं प्रधानमन्त्री पदं राजीनामा धाःसा मबीगु खँ सूत्रं धाःगु दु । अज्याःगु अवस्थाय् वय्कलं मन्त्रिमण्डल पुनर्गठन यानाः पत्याः यायेबहःम्ह मनूयात च्वय्या स्थान बीगु व लिपा वयात हे कार्यवाहक प्रधानमन्त्री बियाः सरकारया बागडोर धाःसा थःगु हे ल्हातिइ तया तयेगु वय्कःया बिचाः जुयाच्वंगु खँ नं सूत्रं धाःगु दु ।
प्रधानमन्त्री ओली उसाँय् मदुगु अवस्थाय् वय्कलं प्रधानमन्त्री पदं राजीनामा बियादीगु जुइमाः धकाः पार्टी दुने अनुमान याना हःगु खः । खास यानाः मेम्ह अध्यक्ष पुष्पकमल दाहाल व वय्कःया पक्षधर नेतातय्सं थ्व आशा याःगु खः । तर प्रम ओलीं पद त्वःतेगु छुं हे संकेत बियामदीगु खँ सूत्रं धाःगु दु ।
प्रम ओलीं थः पिहां वने माःगु घडीइ कार्यवाहक प्रधानमन्त्री हे दयेकेगु लागिं बिष्णु पौडेल बारे बिचाः यानादीगु खःसां पौडेलं धाःसा थः सरकारय् मवनेगु बिचाः न्ह्यःने तयादीगुलिं खँ पिहां वःगु दु ।
वय्कलं आः नकतिनि थम्हं हे नियुक्त याःपिं सल्लाहकारपिंत राजीनामा बिउ धकाः निर्देशन बियादीगु खः । तर आः वयाः हानं उकी मध्ये छुं सल्लाहकारपिंत कायम यानाः छुं छुं जक सल्लाहकारया राजीनामा स्वीकृत यायेगु तयारी यानाच्वंगु खँ धाःगु दु ।
मप पुनर्गठन यायेगु तयारी
प्रधानमन्त्री केपी ओलीं मन्त्रिमण्डल पुनर्गठन यायेगु लागिं मेम्ह अध्यक्ष पुष्प कमल दाहाललिसे सल्लाह यानादीगु दु । आःया पालय् पुनर्गठन धकाः यक्व हेरफेर मयासे च्याम्ह झिम्ह जक पुलांपिं लिकयाः न्हूपिं तयेगु तयारी वय्कलं यानादीगु खँ सीदुगु दु । थुकी वय्कलं पार्टी दुने थःत तसकं आलोचना याइम्ह घनश्याम भूषालयात तकं मन्त्री दयेकीगु निश्चित जुयाच्वंगु खँ सूत्रं धाःगु दु ।
वय्कलं थः विश्वासपात्र लिसें पार्टीया महासचिव बिष्णु पौडेलयात अर्थ मन्त्रालय सहित उपप्रधानमन्त्री दयेकेगु तयारी यानादीगु खःसां पौडेलं मन्त्री मजुइगु खँ धयादीगु दु । लिसें सुवास नेम्बाङं नं मन्त्री मजुइगु खँ धाःगु सीदुगु दु ।
LEAVE YOUR COMMENTS