३० म्ह विरुद्ध मुद्दा दायर, उच्चपदस्थतय्त अदालतं त्वःतूसां प्रहरीं हानं ज्वनीगु
येँ (नेपालभाषा टाइम्स)- नक्कली भुटानी शरणार्थी प्रकरणय् स्वाःपिं सुइम्हेसिया विरुद्ध मुद्दा दर्ता जूगु दु । पुलांम्ह उपप्रधानमन्त्री टोपबहादुर रायमाझी, पुलांम्ह गृहमन्त्री बालकृष्ण खाँण सहितयात राज्य विरुद्धया अपराध, ठगी, संगठित अपराध व किर्ते सहित प्यंगू कसुरय् द्वपं बियातःगु दु ।
उमिगुपाखें २८ करोड बराबरया बिगो माग नं यानातःगु दु । सरकारी वकिलया ज्याकूयात प्रहरीं निन्हु न्ह्यः बिउगु प्रतिवेदनया अध्ययन यानाः म्हिगः येँ जिल्ला अदालतय् थ्व मुद्दा तःगु खः । म्हिगः दर्ता याःगु अभियोग पौ २२४ पेज ताःहाकः जू ।
येँ जिल्ला सरकारी वकिलया ज्याकुथिं दायर याःगु मुद्दाय् केशवप्रसाद दुलाल, सानु भण्डारी, सागर राई, सन्देश शर्मा, टंकबहादुर गुरुङ, इन्द्रजित राई, टोपबहादुर रायमाझी, सन्दिप रायमाझी, टेकनारायण पाण्डे, नरेन्द्र केसी, गोविन्दकुमार चौधरी, रामशरण केसीयात विपक्षी दयेकातःगु दु ।
उकथं हे पुलांम्ह गृहमन्त्री बालकृष्ण खाँण, पुलांम्ह सभासद आङटावा शेर्पा, हज कमिटीया अध्यक्ष शम्शेर मियाँ, भुटानी शरणार्थी नेता टेकनाथ रिजाल, लक्ष्मी महर्जन, केशव तुलाधर, हरिभक्त महर्जन, अशोक पोखरेल, धिरेन राई, दिपा हुमागाईं, निरज राई, राजेश अर्याल, मोहनराज राई, आशिष बुढाथोकी, विनिता सावदेन लिम्बु, निरञ्जनकुमार खरेल, सुनिल बुढाथोकी व प्रतिक थापायात नं विपक्षी दयेकातःगु दु ।
थ्वहे झ्वलय् सीदु कथं उपप्रधान– मन्त्री रायमाझी, गृहमन्त्री खाँण लगायत झिंखुम्हेसित अदालतया आदेशं त्वःतूसां हानं ज्वने फइगु सम्भावना दु । सरकारी वकिलया ज्याकुथिं दायर याःगु मुद्दाय् प्रतिवादीत त्वःतीगु सम्भावना दत धाःसा सम्बन्धित प्रहरी ज्याकुथिइ लित छ्वया बीत इनाप यानातःगु दु ।
उमिगु विरुद्ध अख्तियार दुरुपयोग अनुसन्धान आयोग व सम्पत्ति शुद्धीकरण अनुसन्धान विभागय् थप अनुसन्धानया नितिं च्वया छ्वयेगु निर्णय जूगुलिं हाकनं ज्वनाः प्रहरी कार्यालयय् लित छ्वयेत अभियोग पतिइ न्ह्यथनातःगु दु ।
थाय्थासय् प्रदर्शन
थ्वहे झ्वलय् मानव अधिकार तथा शान्ति समाजं थ्व प्रकरणया मू दोषीयात कारबाही यायेमाः धइगु माग यासें २२ गू जिल्लाया ४६ थासय् धर्ना बिउगु दु ।
समाजं प्रधानमन्त्री पुष्पकमल दाहालयात सीडीओ मार्फत ज्ञापन पौ नं बिउगु दु । स्वंगू बुँदाया ज्ञापन पतिइ नक्कली भुटानी शरणार्थी प्रकरणय् सरकारी कार्यदल नीस्वंगु इलंनिसें चलखेल तकया फुक्कं फेहरिस्तया शूक्ष्म अध्ययन÷अनुसन्धान यानाः मू दोषी प्रमुख दलया शीर्ष नेता जूसां वा न्ह्याम्ह हे जूसां कानुनसम्मत कारबाही यायेत इनाप यानातःगु दु ।
उकथं हे नक्कली भुटानी प्रकरणय् दुथ्याःपिंत कारबाही यायेमाःगु माग यासें म्हिगः येँय् संयुक्त मजदुर संगठनं नं प्रदर्शन याःगु दु । थनया फिब्व ख्यलय् थीथी राजनीतिक संगठनया मजदुर संगठनं मंकाः कथं प्रदर्शन याःगु खः ।
LEAVE YOUR COMMENTS