चःबि निर्माण व संचालन यायेत कार्यदल

येँ – येँ महानगरपालिकां सार्वजनिक चःबि निर्माण यायेगु निंतिं प्रक्रिया न्ह्याकूगु दु । येँ मनपां आवश्यक थाय् स्वयाः स्मार्ट सार्वजनिक चःबि दयेकेत छगू कार्यदल गठन याःगु खः । येँ मनपां दयेकीगु स्मार्ट सार्वजनिक चःबि निर्माणया निंतिं येँ मनपाया ईश्वरमान डंगोलया संयोजकत्वय् छगू कार्यदल गठन याःगु खः ।

येँ मनपा १५ वडाअध्यक्षतकं जुयाच्वनादीम्ह प्रवक्ता डंगोलया संयोजकत्वय् गठन याःगु कार्यदलय् राजस्व विभागया निर्देशक शिवराज अधिकारी, कानून महाशाखाया प्रमुख वसन्त आचार्य व शाखा अधिकृत शरी वाग्ले, अन्तर्राष्ट्रिय सम्बन्ध सचिवालय प्रमुख महेश काफ्ले दुजलय् च्वनादीगु दु ।

उगु कार्यदलं स्मार्ट सार्वजनिक चःबि निर्माण व संचालनया निंतिं कार्यविधि तयार याइ धाःगु दु । थनिं निदँ न्ह्यः हे महानगर लागा दुने थीथी पीछगू थासय् स्मार्ट चःबि निर्माण यायेगु लक्ष्य कयातःगु खः । तर येँ मनपाया उगु योजना न्ह्याः वने मफयाच्वंगु खः । कार्यदलयात आवश्यकताकथं सम्बन्धित क्षेत्रया कर्मचारीयात परिचालन याये फइगु अधिकार नं बियातःगु दु ।

अथे हे उगु कार्यदलयात स्मार्ट सार्वजनिक चःबि दयेकेत उपयुक्त थाय्या पहिचान यायेगु, थाय्कथंया डिजाइन यकिन यायेगु, चःबि निर्माण यायेत वःगु प्रस्तावया विश्लेषण यायेगु लगायतया जिम्मेवारी बियातःगु दुसा थाय् व डिजाइनय् तयार जूगु प्रस्तावकथंया चःबि निर्माण व उकिया संचालन यायेगु नं जिम्मेवारी बियातःगु दु । येँ मनपां म्हो थासय् म्हो लागतय् सार्वजनिक चःबि निर्माण यायेगु योजना दयेकातःगु दु ।