रुसया विश्वकपं येँय् हल्ला मजुइमा

येँ – न्ह्यःने वयाच्वंगु विश्वकप फुटबलया सन्दर्भय् येँया सीडीओ कार्यालयं छगू सार्वजनिक सुचं जारी याःगु दु । विश्वकप फुटबलया इलय् त्वालय् गनं नं होहल्ला याये मदइगु, कर्पिन्त समस्या याये मदइगु व गनं सार्वजनिक रुपं फुटबल प्रदर्शन यायेबलय् सुयाकें नं ध्यबा काये मदइगु सुचं सीडीओ कार्यालयं जारी याःगु खः ।

सीडीओपाखें विश्वकपया सन्दर्भय् झिगू बुँदा दुगु सुचं जारी यासें गनं नं फुटबल कासाया सार्वजनिक प्रदर्शन यायेगु खःसा सीडीओयाके पूर्व अनुमति कयाः जक क्यने दइगु खँ नं धाःगु दु ।

नापं फुटबल कासायात कयाः गनं नं सत्तेबाजी कासा म्हिते मदइगु, बाजी तये मदइगु व जुवा तास तकं म्हिते मदइगु खँ धाःगु दु । अथे हे सार्वजनिक रुपं फुटबल प्रदर्शन जुइथाय् गनं नं अय्लाःथ्वँ त्वने मदइगु खँ सुचनय् धयातःगु दु । लिसें ल्वापुख्यापु जुइफुगु खँयात ध्यानय् तयाः अथे प्रदर्शन जुइथाय् अनिवार्य रुपं सीसीटिभी नं तयेमाःगु खँ धाःगु दु ।