इंग्ल्यान्ड मिस्तय् विश्वकपया फाइनलय्

एजेन्सी- सहआयोजक अस्ट्रेलियायात बुकाः इंग्ल्यान्ड मिस्तय् विश्वकप फुटबलया फाइनलय् दुहांवंगु दु । बुधवाः सिडनीया रंगशाला जायेकः दुपिं अस्ट्रेलियन समर्थकतय्त स्तब्ध यायेगु झ्वलय् इंग्ल्यान्डं ३–१ गोलं कासा त्याकूगु खः । इंग्ल्यान्ड विश्वकप फुटबलय् न्हापांखुसी फाइनलय् थ्यंगु खः । अथेहे इंग्ल्यान्ड सन् १९६६ लिपा दकलय् न्हापां छुं नं कथंया विश्वस्तरीय धेंधेंबल्लाःया फाइनलय् थ्यंगु नं थ्व न्हापांखुसी खः ।

कासाया ३६ औं मिनेटय् इला टूनें इंग्ल्यान्डयात अग्रता बिउगु खः । तर कासाया ६३ औं मिनेटय् अस्ट्रेलियाया स्टार स्ट्राइकर साक केरं २५ यार्ड तापाकं याःगु कडा प्रहार गोलय् परिणत जुइवं कासा बराबरीइ वःगु खः ।

थ्व लिपा अस्ट्रेलियां बांलाःगु कासा न्ह्यब्वयाच्वंगु खःसां डिफेन्डरतय् गल्तीया कारणं ७१ औं मिनेटय् लउरेन हेम्पं गोलयासें इंग्ल्यान्डयात हाकनं अग्रता बिउगु खः । थ्व लिपा कासा क्वचाये ४ मिनेट न्ह्यः अलेसिया रुस्सों इंग्ल्यान्डया निंतिं थप छगू गोल यानाबिउगु खः ।

इंग्ल्यान्ड प्रशिक्षक सरिना विगम्यानया नेतृत्वय् दुगु इंग्ल्याण्ड युरोपियन च्याम्पियन नं खः । प्रशिक्षक विग्म्यानं इंग्ल्यान्डयात निदँया दुने बल्लाःगु टिम दयेकूगु खः । इंग्ल्यान्डं आः आइतवाः स्पेनलिसे सिडनीइ फाइनल कासा म्हितीसा अस्ट्रेलियां स्वीडेनलिसे स्वंगूगु थाय्या निंतिं धेंधेंबल्लाः याइ ।