युरो च्याम्पियन व कोपा च्याम्पियन दथुइ मैत्रीपूर्ण कासा जुइगु

एजेन्सी-युरो च्याम्पियन इटाली व कोपा अमेरिका च्याम्पियन अर्जेन्टिनाया दथुइ मैत्रीपूर्ण कासा जुइगु जूगु दु । अर्जेन्टिनाया महान कासामि डिएगो म्यारोडोनाया लुमंतिइ इटाली व अर्जेन्टिनाया दथुइ ‘म्यारोडोना सुपर कप’ नांयागु मैत्रीपूर्ण कासा जुइत्यंगु खः । थ्व कासा इटालीया नेपल्सय् यायेगु तयारी जुयाच्वंगु दु । कासाया निंतिं युरोपेली फुटबल संघ युइएफए व दक्षिण अमेरिकी फुटबल संघ कोनमेबोलया दथुइ खँल्हाबल्हा जुयाच्वंगु दु ।

म्यारोडोनां अर्जेन्टिनाया निंतिं सन् १९८६ इ विश्वकप त्याकूगु खः । थःगु क्लब करियरया उत्कृष्ट कासा धाःसा इटालीयन क्लब नापोली पाखें म्हितूगु खः । थ्व हे कारणं नापोलीइ च्वंपिंसं म्यारोडोनायात तसकं हनाबना तः । म्यारोडोना मदये धुंकाः म्यारोडोनाया लुमंतिइ इटाली च्वंगु सान पावोलो रंगशालाया नां हिलाः डिएगो अर्मान्डो म्यारोडोना तःगु खः ।

इटालीं वंगु सोमवाः इंग्ल्याण्डयात बुकाः युरोकपया उपाधि त्याकूगु खःसा अर्जेन्टिनां आइतवाः ब्राजिलयात बुकाः कोपा अमेरिकाया उपाधि त्याकूगु खः ।