येँ मनपायात नेवाः पत्रकारतय् सुभाय्

येँ– नेवाः पत्रकार राष्ट्रिय दबुलिं येँ महानगरपालिकां नेपालभाषाया पाठ्यसफू प्रकाशन याःगु खँय् मनपा लिसें मनपा प्रमुख विद्यासुन्दर शाक्ययात सुभाय् देछाःगु दु ।

दबूया केन्द्रीय नायः सुरज वीर वज्राचार्यं थन छगू वक्तव्य जारी यासें येँ देय्या जनतायात थनया हे स्थानीय भासं ब्वंकेगु व्यवस्था याःगुलिं थुकिं स्थानीय भाय्या संरक्षण जुइ धासें सुभाय् देछाःगु खः । वक्तव्यय् येँ मनपां याःगु थ्व ज्या मेमेगु स्थानीय सरकारतय् लागिं नं नालेबहः जुइगु खँ नं न्ह्यथनातःगु दु ।

अथेहे नेवाः पत्रकार राष्ट्रिय दबू येँ शाखां नं छगू वक्तव्य जारी यासें येँ महानगरपालिका व मेयर शाक्ययात सुभाय् देछाःगु दु । शाखाया नायः अर्बिन्द्रमान सिहं जारी यानादीगु वक्तव्यय् नेपाःया संविधानय् दुथ्याःगु मौलिक हक छ्यलाः शिक्षाय् स्थानीय पाठ्यक्रम विकास यायेगु झ्वलय् येँ महानगरपालिकां थनया संस्कृति, सभ्यताया म्हसीका बीगु निंतिं नेवाः भाय्या माध्यमं हे पाठ्यक्रम तयार यायेगु ज्या याःगु तसकं हे च्वछायेबहःगु ज्या खः धयातःगु दु ।

वक्तव्यय् धयातःगु दु, ‘नेवाः आन्दोलनया सुरुवातंनिसें हे छगू मू मागकथं न्ह्यःने वयाच्वंगु मातृभाषां शिक्षा काये दयेमाः धइगु मागयात सम्बोधन यायेगु ज्याय् येँ महानगरपालिकां क्यंगु सदासयता व उदाहरणीय ज्यायात नेवाः पत्रकार राष्ट्रिय दबू येँ जिल्लापाखें सराहना यासें थुगु ज्याय् न्ह्यचिलादीपिं येँ महानगरपालिकाया मेयर भाजु विद्यासुन्दर शाक्य, उपमेयर मय्जु हरिप्रभा खड्गी श्रेष्ठ, येँमनपा शहरी योजना आयोग, शिक्षा विभागया स्थानीय विषय नेपालभाषा पाठ्यक्रम निर्माण समिति व येँ महानगरपालिकाया सकल जःपिन्त सुभाय् देछानाच्वना ।’

 

सम्बन्धित बुखँ

LEAVE YOUR COMMENTS