सोनी राजभण्डारीया न्हूगु म्येँ

येँ- गायिका सोनी राजभण्डारी झिंखुदँ लिपा हाकनं न्हूगु म्येँ ज्वनाः पिलूझाःगु दु । वय्कःया न्हूगु म्येँ व म्येँया म्युजिक भिडियो आइतवाः छगू ज्याझ्वःया दथुइ सार्वजनिक याःगु दु । झिंखुदँ न्ह्यव लिधंसा म्येँचाकय् निपु म्ये हालादीम्ह वय्कः थुगुसी न्हूदँया झालाय् दर्शनवीर शाक्यं च्वयादीगु ‘लुमन्ति छंगु वइबलय्…’ म्येँ ज्वनाः हाकनं नेपालभाषा संगीत ख्यलय् लिहां झाःगु खः । थ्व म्येँय् संगीत जुगल डंगोलं तयादीगु खः ।

ब्याहा लिपा झिखुदँ तक मचा ब्वलंकेगु व छेँ धन्दाय् लगे जुयाः संगीत ख्यलं तापाक च्वनेमाःगु धासें वय्कलं आः थः जहानया हःपालं हाकनं संगीत क्षेत्रय् लिहां वयागु खँ कनादिल ।

आइतवाः सुरज महर्जनं निर्देशन यानादीगु म्येँया म्युजिक भिडियो सार्वजनिक याःगु खः । म्येँय् रजनी शाही व दीपेन्द्र सिंह ठकुरीं म्हितातःगु दुसा म्युजिक भिडियोया छायाँकन भाइकाजी महर्जन नयनं यानादीगु खः ।

सम्बन्धित बुखँ

LEAVE YOUR COMMENTS