क्यानाडाय् स्वक्वःगु मंकाः इहि मुना
येँ(नेपालभाषा टाइम्स)- क्यानाडाय् स्वक्वःगु मंकाः इहि मुना ज्याझ्वः जूगु दु । क्यानेडियन नेवाः गुथिया ग्वसालय् ब्राम्प्टनस्थित पशुपति नेपाली देगलय् उगु मंकाः इहि मुना जूगु खः ।
इहि यायेत हःपिं मस्तय्त विधिपूर्वक मूलुखानिसें इहि याइगु थासय्तक लसकुस याना यंकाः विधिपूर्वक इहि प्रक्रिया न्ह्याकूगु खः । इहि ज्याझ्वः पुरोहित भूपतिआनन्द राजोपाध्यायं न्ह्याकादीगु खः । इहि नेवाः समाजय् मिसा मस्तय्त याइगु प्रमुख संस्कारमध्ये छगू खः । इहि ज्याझ्वः विधिपूर्वक न्ह्याकाः दकलय् लिपा मस्तय्त थाय्भू नकेगु व वयां लिपा मस्तय् थःथितिपाखें बारां छुकेगु ज्या याःगु खः ।
गुथिया मूछ्याञ्जे विमलमान श्रेष्ठं सकसितं लसकुस यानादिसें नेवाः संस्कार, संस्कृति, परम्परा ल्यंकातयेत व देशं पिने च्वनाच्वंपिं नेवाःतय्त झीगु संस्कार, संस्कृति बारे जानकारी बीगु ल्याखं थुकथं थीथी गतिविधि व ज्याझ्वः याना वयाच्वनागु जानकारी बियादिल ।
गुथिया नायः प्रकाश प्रधाना· इहि यानादीपिं मस्तय्त दसिपौ लःल्हानादीगु खःसा अमेरिकानिसें झायाः इहि ज्याझ्वः न्ह्याकादीम्ह मूल पुरोहित राजोपाध्याययात सम्मानपत्र लःल्हानादीगु खः । ज्याझ्वलय् नवासें पुरोहित राजोपाध्यायं नेवाः संस्कार, संस्कृतिया संवद्र्धनया निंतिं क्यानाडाय् वयाः थुकथंया ज्याझ्वः याये खंगुलिं लसता प्वंकादिसें थुगु ह्वःताः चूलाका बिउगुलिं गुथिप्रति आभार नं प्वंकादिल ।
नेप्लिज क्यानेडियन हेरिटेज सोसाइटीया सभापति डा. लिला भण्डारीं इहि ज्याझ्वः पशुपति देगलय् वयाः यानादीगुलिं गुथियात सुभाय् देछानादिसें वइगु दिनय् नं थुकथंया ज्याझ्वः यायेत इनाप यानादिल ।
इहि यायेत हःम्ह छम्ह मचाया अभिभावक विनोज श्रेष्ठं नेपालं तापाक क्यानाडाय् वयाः नं नेवाः संस्कारय् छगू महत्वपूर्ण इहि ज्याझ्वः नेवाः संस्कृतिकथं हे याये खंगुलिं लसता प्वंकादिसे थुकथंया ज्याझ्वः ग्वसाः ग्वःगु गुथियात सुभाय् देछानादिल ।
गुथिया छ्याञ्जे सुमन राजवंशीं सुभाय् देछानादीगु ज्याझ्वलय् दकलय् लिपा गुथिया न्वकु उत्तम माकःजु, बद्री पंगेनीं भक्ति संगीतया प्रस्तुति बियादीगु खः । ज्याझ्वलय् ५ दँनिसें ११ दँ दुपिं मिसा मस्तय् इहि याःगु खः ।
LEAVE YOUR COMMENTS