कुम्हाःतय्त चाया थलबल पाये मखनाः चिउताः
ख्वप (नेपालभाषा टाइम्स)- चाया थलबल दयेकेगु परम्परागत पेशा दुपिं थनया कुम्हाःतय्त थ्व इलय् तसकं समस्या जुयाच्वंगु दु । वंगु छुं दिं न्ह्यःनिसें मदिक्क वा वयाच्वंगुलिं चाया थलबल दयेकेगु पेशा याना वयाच्वंपिं थनया कुम्हात थलबल गंके मखनाः चिन्तित जुयाच्वंगु दु ।
थीथीकथंया चाया थलबल दयेकेगु ज्या जूसां उकियात निभालय् पाये माःगु खःसा बांलाक निभाः मत्वःगु जक मखु छुं दिं न्ह्यःनिसें मदिक्क वया वयाच्वंगुलिं समस्या जूगु थ्व पेशाय् संलग्न कुम्हाःतय्सं धाःगु दु । छखे निभाः मत्वःगुलिं चाया थलबल गंकेत हे समस्या जुयाच्वंगु दुसा मेखे वा वयाच्वंगुलिं अज्याःगु थलबल छुइत सिँ मुंका तयेत नं उतिकं समस्या जुयाच्वंगु दु ।
ख्वप नगरपालिकाया सुर्जमरि, तालाक्व, चुनदेवी लिवालि, सूर्यविनायक आदि लागाया कुम्हाःतय्सं व्यावसायिक रुपं चाया थलबल दयेकेगु याना वयाच्वंगु दु । छुं दिं न्ह्यःनिसें मदिक्क वया वयाच्वंगुलिं पिने यायेमाःगु ज्या नं बांलाक याये खनाच्वंगु दुसा दयेकातःगु चाया थलबल नं निभालय् पाये मखंगुलिं दुने हे तयाः गंकेत बाध्य जुयाच्वंगु दु ।
तालाक्वया स्थानीय रमेश प्रजापतिं मदिक्क वा वयाच्वंगसलिं छेँ पिने यायेमाःगु ज्या याये मखनाच्वंगु व थलबल नं गंके मखंगुलिं छेँ दुने हे तयाः गंकेगु ज्या जुयाच्वंगु धयादिल । वय्कलं मौसम बांलात धाःसा पिने तयाः गंकेगु व उकियात छुइगु ज्या नं जुइ धासें आःयात छेँ दुने हे छिंछिं थाय् तयाः गंकेत बाध्य जुयाच्वंगु खँ कनादिल । अथे हे सुर्जमरिया श्यामकृष्ण प्रजापति नं थम्हं दयेकातःगु थलबल निभाय् पाये मखनाः चिन्तित जुयाच्वंगु दु ।
नखः न्ह्यःने वयेत्यंगु इलय् चाया थलबलया ज्या हे दिकातयेमाःगुलिं स्थानीय कुम्हाःतय्त समस्या जुयाच्वंगु दु । थनया कुम्हाःतय्सं पाल्चा, गमला, भ्यगः, चिया कप, पर्यटकीय ज्वलं जुजु धौया निंतिं भ्यगःलिसें थीथीकथंया घरायसी ज्वलं दयेकेगु यानाच्वंगु दु ।
वा वयाच्वंगुलिं थःपिंस दयेकागु थलबल गंकेगु व छुइ मखनाः स्यनीगु नं जूगुलिं थःपिनिगु पेशा हे विस्थापित जुइगु खःला धइगु ग्याःचिकु तकं इमिके खने दयाच्वंगु दु ।
LEAVE YOUR COMMENTS