वकिलतय् हडताल जिल्लाय् थ्यन

येँ- प्रधानन्यायाधीश चोलेन्द्र शम्शेर विरुद्ध म्हिगः नं नेपाल बार एसोसिएसनं प्रदर्शन याःगु दु । म्हिगः वकिलतय्सं सर्वोच्च अदालत न्ह्यःने बिउगु धर्नाय् प्रहरीं हस्तक्षेप याःगु खःसां वकिलतय्सं प्रतिकार यायेवं प्रहरी लिचिउगु खः ।

बारया अध्यक्ष चण्डेश्र श्रेष्ठं सम्बोधन यानाच्वंगु इलय् प्रहरीं माइक व स्पिकर लाका कयाः शान्तिपूर्ण प्रदर्शनय् हस्तक्षेप याःगु खः । थःगु सम्बोधनय् अध्यक्ष श्रेष्ठं प्रधानन्यायाधीशं न्यायालय दुहां वनेगु अधिकार तंकेधुंकूगु धासें प्रधानन्यायाधीशया जक मखु न्यायालयय् विचौलिया ज्या याइपिं फुकसिया सम्पत्ति छानविन यायेमाःगु माग नं याःगु खः ।

उकथं हे नेपाल बारया न्ह्यानाच्वंगु आन्दोलनयात स्यंकेगु उद्देश्य तयाः अदालत न्ह्यःने छपुचः ल्याय्म्हतय्सं प्रदर्शन याःगु दु । थीथी नारा च्वयातःगु प्लेकार्ड ज्वनाः मोटरसाइकल ¥याली सहित वःपिं ल्याय्म्हतय्त नं प्रहरीं हस्तक्षेप यायेवं उपिं लिहां वंगु खः ।

म्हिगः नेपाल बारया प्रदर्शन झ्वलय् प्रधानन्यायाधीश जबरायात सर्वोच्च अदालतय् दुमछ्वयेगु कुतः जूगु खः । तर प्रधानन्यायाधीश जबरा धाःसा मेगु हे लँपु जुयाः अदालतय् दुहां वंगु खः । अदालत न्ह्यःने वकिलतय्सं प्रदर्शन यानाच्वंगु खःसा प्रधानन्यायाधीश सर्वोच्च अदालत थ्यनेवं प्रहरीं प्रदर्शनय् हस्तक्षेप याःगु खः ।

थ्वहे झ्वलय् प्रधानन्यायाधीश जबराया विरोधय् देय्या थीथी थासय् प्रदर्शन याःगु दु । म्हिगः कास्की जिल्लाया पोखराय् जिल्ला अदालत व उच्च अदालत न्ह्यःने ल्हातिइ हाकुगु पट्टि चिनाः प्रदर्शन याःगु खः ।

उकथं हे बुटवलय् नं न्यायाधीश जबराया बहिर्गमनया माग यासें उच्च अदालत उच्च बुटवलय् वकिलतय्सं प्रदर्शन याःगु दु । बुटवलय् न्हिं छघौया ल्याखं स्वन्हु तक प्रदर्शन यायेगु खँ धाःगु दु । उकथं हे सुदूरपश्चिमय् नं प्रधानन्यायाधीश जबराया राजीनामा माग यासें प्रदर्शन याःगु दु । सुदूरपश्चिमया गुंगू जिल्ला अदालत व निगू उच्च अदालतय् वकिलतय्सं प्रदर्शन याःगु खः ।

थ्वहे झ्वलय् प्रधानन्यायाधीश जबराया राजीनामा माग यासें बेञ्च बहिष्कार याना वयाच्वंपिं न्यायाधीशतय्सं श्वेतपत्र जारी यायेगु तयारी यानाच्वंगु खँ सीदुगु दु । जनताया मुद्दा मस्वसे छम्ह व्यक्तिया राजीनामाया लिउलिउ न्यायाधीशत वनाच्वंगु धइगु न्ह्यसः ब्वलनेवं न्यायाधीशतय्सं मंकाः श्वेतपत्र जारी यायेत्यंगु खः ।

सर्वोच्च अदालतय् फुलकोर्ट कथं प्रधानन्यायाधीश सहित नीम्ह दुथ्याः । उकी मध्ये झिंगुम्ह न्यायाधीशं प्रधानन्यायाधीश जबराया राजीनामा माग यानाः बेञ्च बहिष्कार याना वयाच्वंगु दु । न्यायाधीशतय् इजलास बहिष्कारं यानाः जनताया दथुइ बांलाःगु सन्देश मवंगु धासें वैकल्पिक विधिपाखें इजलास च्वनेगु बारे नं सहलह यानाच्वंगु खँ सीदुगु दु ।