नगरप्रमुख शाक्यपाखें ध्यान पार्कया शिलान्यास

येँ – येँ महानगरपालिकाया प्रमुख विद्यासुन्दर शाक्यं चःमतिइ निर्माण यायेत्यंगु ध्यान पार्कया शिलान्यास यानादीगु दु । महानगर प्रमुख शाक्यं येँ महानगरपालिका वडा नं. १५या चःमतिस्थित चःमति जग्गा विकास आयोजना क्षेत्रय् निर्माण यायेत्यंगु ध्यान पार्कया शिलान्यास यानादीगु खः ।

जनमार्ग उपभोक्ता समितिया ग्वसालय् जूगु ध्यान पार्क शिलान्यास ज्याझ्वलय् नवासें महानगर प्रमुख शाक्यं थःपिं जनप्रतिनिधिया रुपय् निर्वाचित जुया वयेधुंकाः आयोजनाया ज्या निदँया दुने सिधयेकेगु लक्ष्य कयागु खःसां परिस्थितिं यानाः पूवंके मफुगु खँ कनादिल ।

‘आयोजनाया ज्या निर्वाचित जुया वयागु निदँया दुने सिधयेकेगु लक्ष्य कयागु खः । लक्ष्यकथं हे ज्या नं न्ह्यानाच्वंगु खः । तर दथुइ कोरोना महामारीया कारणं छुं ई थ्व ज्या लिज्याः वन’ वय्कलं धयादिल ।

आयोजनाया ज्या सिधयेकाः ०७८ असार दुने उपभोक्तायात लःल्हायेगु योजना दुगु खःसां विश्वव्यापी महामारीया रुपय् न्यना वंगु कोरोना संक्रमणया कारणं छुं ई लिज्याः वंगु वय्कःया धापू खः ।

येँ महानगरपालिकाया प्रवक्तालिसें १५ वडाअध्यक्ष ईश्वरमान डंगोलं थःपिंसं थःगु दायित्व पूवंका वयाच्वनागु व उकिया दिगो व्यवस्थापनय् स्थानीयवासी व उपभोक्ता समितिया हे मुख्य भूमिका दइगु खँ कनादिल ।

मुक्कं १४ आना जग्गाय् ५५ गू लख २२,४२० तका लागतय् उगु ध्यान पार्क निर्माण यायेत्यंगु खः । कुल लागतय् ८५ प्रतिशत अर्थात येँ महानगरपालिका व १५ प्रतिशत स्थानीय उपभोक्तां व्यहोरे याइगु नं ज्याझ्वलय् जानकारी बिउगु दु । पार्क निर्माणया ज्या वइगु माघ दुने क्वचायेकेगु लक्ष्य कयातःगु दु ।

शिलान्यास ज्याझ्वलय् येँ महानगर पूर्वाधार विकास विभागया प्रमुख राम थापा, चःमति जग्गा विकास आयोजना प्रमुख रामबाबु महतो, महानगरीय प्रहरी वृत्त स्वयम्भूया प्रमुख मिलन केसी, जनमार्ग टोल सुधार समितिया अध्यक्ष जगदीश्वरलाल श्रेष्ठ लगायतं नुगःखँ तयादीगु खः ।

सम्बन्धित बुखँ

LEAVE YOUR COMMENTS