‘केहेँ किजापिंत मतिनाया पौ’ सफू पितब्वज्या

येँ – वरिष्ठ च्वमि बुद्ध शाक्य नेवाःया झिगूगु कृति ‘केहेँ किजापिंत मतिनाया पौ’ शनिवाः सातोआकी भवन कुपण्डोलय् मूपाहां शताब्दी पुरुष संस्कृतिविद् सत्यमोहन जोशीं पितब्वज्या यानादीगु दु ।भूपु मेयर बेखारत्न शाक्यया सभापतित्वय् जूगु ज्याझ्वलय् सफुलिइ दुथ्याःगु ५० पु पौया विषयवस्तुबारे दुग्यंक चर्चा जूगु खःसा पाहाँ कथं झायादीम्ह डा. केशवमान शाक्यं पौया माध्यमं नं वैज्ञानिकत म्हसीकेगु व नैतिक शिक्षा नापं ज्ञान बिइफइगु खँ थुगु सफुतिं क्यनाब्यूगु न्ह्यथना दिल ।

डब्लुएनओ नेपाः च्याप्टरया नायः शाक्य सुरेनं भाषा व जातिया सेवा यायेत उमेरं मपनीगु खँ बुद्ध नेवाः नं क्यनाबिउगु दु धयादिल । इलोहंया सम्पादक नरेशवीर शाक्यं स्यल्लाःगु साहित्य सृजना यायेत डीग्री हासिल याये हे माः धयागु मदु, स्वअध्यन जक दुग्यंक यात धाःसा नं गाःगु थुगु सफुतिं प्रमाणित याःगु खँ धयादिल ।

प्रकाशकपिं डा. सचेतन मान तुलाधर, डा. पवित्रा शाक्य तुलाधर व लसता तुलाधरपिंसं छ्वयाहयादीगु भिन्तुना पौ ब्वँसें प्रा. सर्वज्ञमान तुलाधरं लसकुस न्वचु बियादीगु उगु ज्याझ्वलय् सफूया समिक्षा नेपालभाषा परिषदया नायः सुवर्ण शाक्यं यानादीगु खः ।