छायादेवीइ फिल्म मुहूर्त मयायेत इनाप

येँ – थनया थँबहिली च्वंगु विवादास्पद छायादेवी कम्प्लेक्सय् थौं शुभमुहूर्त जुइत्यंगु छगू नेवाः फिल्मया ज्याझ्वः अन मयायेत सम्पदाप्रेमितय्सं इनाप याःगु दु ।

नेवाः राजनीतिक अभियानया नायः श्रीकृष्ण मानन्धरं थन छगू वक्तव्य पिकासें नेवाःतय्गु सम्पदा पलेस्वां पुखू मासे यानाः निर्माण यानातःगु छायादेवी कम्प्लेक्सय् नेवाः फिल्मया ज्याझ्वः यायेगु धइगु नेवाः सम्पदाप्रेमितय्त हतोत्साहित यायेगु ज्या खः धाःगु दु । अन जुइत्यंगु उगु ज्याझ्वः तत्काल दिकेत इनाप यासें वक्तव्यय् थ्व छेँया बारे सर्वोच्चय् मुद्दा लानाच्वंगु खँ नं न्ह्यथनातःगु दु ।