कांग्रेस संसदील दलया नेता देउवा

येँ – कांग्रेस संसदीय दलया नेताय् सभापति शेरबहादुर देउवा निर्वाचित जूगु दु । थौं कांग्रेस संसदीय दलया ज्याकू सिंहदरबारय् जूगु मतदानय् देउवां ४४ मत हयाः त्याकूगु खःसा वय्कःया प्रतिद्वन्द्वी पूर्व महामन्त्री प्रकाशमान सिंहयात १९ मत जक वःगु खः ।

प्यक्वः तक प्रधानमन्त्री जुइधुंकूम्ह देउवा हाकनं पार्टीया संसदीय दलया नेता जुयादीगु दु । आः वय्कः प्रतिनिधि सभाय् प्रमुख प्रतिपक्षी नेता जुयादी ।
निर्वाचन लिपा प्रतिक्रिया बिसें भाजु सिंहं पार्टी नेता कार्यकर्तात सकसिनं न्हूगु नेतृत्व मालाच्वंगु कारणं थःम्हं उम्मेदवारी बियागु धासें मतदान यानादीपिं सकसितं सुभाय् बियादीगु खः ।

आः संसदीय दलया कार्यसमितिया निर्वाचन जुइ । पार्टीया विधान कथं कांग्रेस संसदीय कार्यसमिति २६ म्ह दुजः दुगु जुइ । अथेहे विधान कथं राष्ट्रिय सभाय् दलया नेता संसदीय दलया नेताय् निर्वाचित देउवां हे ल्यइसा राष्ट्रिय सभा व प्रतिनिधि सभाया प्रमुख सचेतक नं दलया नेतां हे ल्यइ ।

कांग्रेस संसदीय दलया उपनेताय् धाःसा देउवां विजय गच्छेदारयात ल्ययेधुंकूगु दु । गच्छेदार लोकतान्त्रिक फोरमयात कांग्रेसय् विलय यानाः हाकनं कांग्रेसय् दुहां वःम्ह खः ।