सांसद यादवपाखें मानवअधिकार आयोगय् अपहरणया उजुरी

येँ – जनता समाजवादी पार्टीया नेता नापं सांसद डा. सुरेन्द्र यादवं थःत जनकपुरं अपहरण यानाः हःगु धासें पुलाम्ह आइजिपी सर्वेन्द्र खनाल व निम्ह सांसद्त महेश बस्नेत व किसान श्रेष्ठ विरुद्ध मानव अधिकार आयोगय् उजुरी बिउगु दु ।

बिहीवाः पुल्चोकस्थित आयोगया ज्याकूथी वनाः डा. यादवं थःत अपहरण याःपिंत आवश्यक छानबिन यानाः कारवाही यायेत माग यानादीगु दु । उजुरीइ सत्ता व शक्तिया लिधंसाय् अपहरण याःपिंसं थःगु ज्यान नं कायेफुगु जोखिम दुगु खँ नं न्ह्यथनातःगु दु ।

थ्वस्वयां न्ह्यः महानगरिय प्रहरी परिसर व सरकारी वकिलया ज्याकूथी उजुरी दर्ता यायेत वंगु इलय् निगूलिं थासय् दर्ता यायेत अस्वीकार याःगु खः ।