देउवायात विश्वासया मत, ओली पक्षया च्याम्ह सांसदत नं देउवा पक्षय्

येँ – प्रधानमन्त्री शेरबहादुर देउवायात संसदय् विश्वासया मत चूलाःगु दु । एमालेया २२ म्ह सांसद लिसें जसपाया महन्ठ ठाकुर पक्षया सांसदतय्सं नं देउवाया पक्षय् मतदान यायेवं विश्वासया मत चूलाःगु खः । आइतवाः बहनी क्वचाःगु मतदानय् देउवायात १६५ मत वःगु खःसा वय्कःया विपक्षय् ८३ मत वःगु खः । देउवाया पक्षय् कांग्रेस, माओवादी केन्द्र, जसपा, एमालेया २२ म्ह सांसदतय्सं मत बिउगु खः ।

एमालेया ओली पक्षया च्याम्ह सांसदतय्सं नं देउवाया पक्षय् मतदान याःगु खः । ओलीया मन्त्रिमण्डलय् बनमन्त्री जूम्ह प्रेम आलें नं देउवाया पक्षय् मत बिउगु खः । ओलीया लिसें हिरा केसी, पार्वती विसुंखे, कलिला खातुन, विनादेवी बुढाथोकी, धनबहादुर बुढा, समिमा हुसेन, किसान श्रेष्ठं देउवाया पक्षय् मतदान याःगु खः ।

मेखे एमालेया माधव नेपाल पक्षया हे झिम्ह धाःसा मतदान मयासे तटस्थ च्वंगु दु । ओली लिसे वार्ताया निंतिं दयेकूगु कार्यदलय् च्वंपिं झिम्हेसिनं मतदान मयासे तटस्थ च्वंगु खः । ओलीलिसे पार्टी एकताया निंतिं सहमति याःपिं थुपिं झिम्हेसिनं नैतिकया ल्याखं नं देउवायात मत बीमछिंगुलिं तटस्थ च्वंगु खँ सीदुगु दु । झपट रावल, घनश्याम भुसाल, सुरेन्द्र पाण्डे, सोमप्रसाद पाण्डे, दीपकप्रकाश भट्ट, यज्ञराज सुनुवार, नारायण खतिवडा, गोकर्ण बिष्ट, राजबहादुर बुढा तटस्थ च्वनेगु धकाः संसद भवनं पिहां वंगु खः । थुपिं झिम्हं देउवायात प्रधानमन्त्री दयेकेमाः धकाः सर्वोच्चय् तःगु मुद्दाय् हस्ताक्षर याःपिं खः ।