नगरकोट सुयागु ?

येँ (नेपालभाषा टाइम्स)- नेपाःमि तय्सं नेपाः–भारत, नेपाः–चीन दथुया सीमा विवादबारे ला यक्व हे सिउ जुइमाः, तर नेपाः दुने हे थीथी जिल्ला व थीथी नगरपालिका दुने ल्यनाच्वंगु सीमा विवाद धाःसा उलि सिउगु खइ मखु ।

थथे नेपाः दुने हे सीमा विवादं यानाः अन्यौलग्रस्त जुयाच्वंगु छगू चर्चित थाय् खः नगरकोट । नगरकोट यक्वस्यां म्हसिउगु व यक्व वनेधुंकूगु पर्यटकीय लागा खः । तर थ्व लागा वास्तवय् नेपाःया छु जिल्लाया छु नगरपालिकाय् लाः धइगु खँ धाःसा आः तकं विवादया हे विषय तिनि ।

काभ्रेपलाञ्चोक जिल्लाया मण्डनदेउपुर नगरपालिका व बनेपा नगरपालिका, ख्वप जिल्लाया चाँगुनारायण नगरपालिका व सक्व नगरपालिकाया दथुइ लानाच्वंगु थाय् खः नगरकोट । न्हापा ला भीरपाखा जक जूबलय् सुयातं वास्ता मदु । तर आः पर्यटकीय विकास जुया वःबलय् थ्व वास्तवय् सुयागु लागा खः धइगु खँय् थ्व प्यंगू नगरपालिकाया दथुइ सीमा विवाद तच्वया वःगु दु ।

थ्व विवाद समाधान यायेगु लागिं तःक्वःमछि बैठक च्वनं नं छुं लिच्वः पिकाये मफुसेंलि आः प्यंगुलिं नपाया मेयर लिसें नापी विभागया पदाधिकारीत च्वनाः छगू समिति गठन याःगु दु । थ्व समितिं नगरकोट लागाया पाखा, पर्वः, खुसि, धः आदि फुक्कया अध्ययन यानाः लछिया दुने प्रतिवेदन लःल्हायेगु योजना दयेकूगु दु ।

नगरकोटया सीमा विवादं यानाः थौंकन्हय् अनं उठे जुइगु कर सुनां कायेगु, विकास निर्माणया ज्या सुनां यायेगु धइगु अन्यौल जुयाच्वंगु दु । उलि जक मखु, जग्गा गुगु स्थानीय तह दुने लाः धइगु निश्चित मजूगुलिं स्थानीय होटलतय्सं जग्गा मिचे यानाः ततःखागु छेँ समेत दयेका हयाच्वंगु दु ।