सामाजिक संचारयात व्यवस्थित यायेत अन्तक्र्रिया

येँ – सामाजिक व अनलाइन संचारयात व्यवस्थित यायेगु सम्बन्धय् छगू अन्तक्र्रिया ज्याझ्वः जुल । पे्रस काउन्सिल नेपालया ग्वसालय् उगु अन्तक्र्रिया ज्याझ्वः जूगु खः ।
काउन्सिलया सभाकक्षय् ‘अनलाइन टेलिभिजन युट्युब लगायतया सामाजिक संजाल व अनलाइन संचारयात गुकथं व्यवस्थित यायेगु’ धइगु विषयय् जूगु अन्तक्र्रियाय् सरोकारवालातय्सं अज्याःगु संचारमाध्यमया नियमन यायेमाःगु नापं आवश्यककथं निर्देशन बीगु व जिम्मेवार याना यंकेमाःगु खँय् बः बिउगु दु ।

काउन्सिलया अध्यक्ष बालकृष्ण बस्नेतं पे्रस काउन्सिल सकलें पत्रकारतय् मंकाः संस्था जूगुलिं हरेक पत्रकार व संचारया स्वामित्व दइ धासें सामाजिक संचार (सोसल मिडिया)पाखें वइगु अडियो व भिडियो सामग्रीइ पत्रकारिता जू वा मजू धइगु सीकेत हे थुकथंयह सहलह ज्याझ्वः यानागु खः धयादिल ।

ज्याझ्वःपाखें प्राप्त सल्लाह व सुझाव ग्रहण यानाः राज्यया दक्वं निकायलिसे समन्वय व सहकार्य यानाः न्ह्याः वनेगु प्रतिवद्धता नं प्वंकादिल ।

काउन्सिलया बोर्ड दुजः गोपाल बुढाथोकीं काउन्सिल व पत्रकार महासंघ मिले जुयाः जारी याःगु आचारसंहिता दुने च्वनाः पत्रकारितापाखें हे स्वच्छ, स्वतन्त्र व मर्यादित पत्रकारितामैत्री पे्रस काउन्सिल निर्माण याये फइगु विचाः तयादिल ।