वज्रयान महाविहार संघया स्थापना
येँ – नेपाल परम्परागत बौद्ध धर्म संघं नेपाल वज्रयान महाविहार संघ विधिवत रुपं स्थापना याःगु दु । थ्व हे वंगु २५६३ क्वःगु स्वांयाःपुन्हिया न्हिकुन्हु लुम्बिनीइ दयेकाच्वंगु नेपाल वज्रयान महाविहारय् चक्रेश्वर, चक्रेश्वरी, महास्थविर (थाय्पा आजु) स्थाविर (थाय्पा)पिंत वज्रयान बौद्ध परम्पराकथं अभिषेक बियाः ‘नेपाल वज्रयान महाविहार संघ’ स्थापना याःगु खः ।
संघपाखें लुम्बिनीइ दयेकाच्वंगु विहारया संस्थापनक अध्यक्ष प्रा. डा. नरेशमान वज्राचार्ययात विहारया चक्रेश्वर, गुरुमां नीता वज्राचार्ययात चक्रेश्वरीया अभिषेक बिउगु खः । स्वनिगःया येँ, यल, ख्वप व थिमिया देय्थाय्पाजुसहितया उपस्थितिइ शिष्यपिंसं चक्रेश्वर, चक्रेशवरीपिंत कलशाभिषेक, मुकुटाभिषेक, वज्राभिषेक, घण्ठाभिषेक, नामाभिषेक, छत्राभिषेक आदि अभिषेक बिउगु खः ।
संघ स्थापनया झ्वलय् चक्रेश्वर, चक्रेश्वरीपिंसं संघया यल कचाया शंखरत्न वज्राचार्य, येँ कचाया उत्तमवज्र वज्राचार्य, ख्वप कचाया पुष्परत्न शाक्य व किपू कचाया संघरत्न वज्राचार्यपिंत संघया महास्थविरया अभिषेक व येँ कचाया मञ्जुश्रीरत्न वज्राचार्य, विकासरत्न वज्राचार्य, यल कचाया राजभाई वज्राचार्यपिंत स्थविरया अभिषेक लःल्हाःगु खः ।
नेपाःया वज्रयानी महाविहार निर्माणया इतिहासय् थुकथं विहार निर्माण यायेगु ज्या थनिं करिब प्यसः दँ न्ह्यः जुजु प्रताप मल्लया पालय् येँया छुस्याबहाःया निर्माण लिपा लुम्बिनीइ नेपाल वज्रयान महाविहार निर्माण लिपा संघया स्थापना जूगु खः ।
विहारया न्हापांम्ह चक्रेश्वर प्रा.डा. वज्राचार्यं आःयात झिम्ह दुजः दुथ्याःगु सघंया स्थापना जूगु धासें याकनं हे न्यय्स्वम्हेसिया संघ दुजः विस्तार यायेगु जुइ धकाः कनादिल ।
लिसें वय्कलं वज्रयान बौद्ध धर्मय् आस्था दुपिं विहारया विनय पालना याइपिं मिसामिजं सकसितं छसिकथं विहार संघय् दुथ्याकेगु योजना दुगु व विहारयात वज्रयान बौद्ध धर्मय् छगू नमूना विहार (बहाः)या रुपय् यंकेगु नं जानकारी बियादिल ।
LEAVE YOUR COMMENTS