डेपुटी गभर्नर श्रेष्ठविरुद्ध छानविन सुरु

येँ – नेपाल राष्ट्र बैंकया डेपुटी गभर्नर शिवराज श्रेष्ठयात कयाः छानविन यायेत दयेकूगु छानविन समितिं सम्पत्ति शुद्धिकरणया खँय् अनुसन्धान सुरु याःगु दु । श्रेष्ठ विरुद्ध थीथी उजुरी लायेवं सरकारं छानविन समिति दयेकूगु खः । डेपुटी गभर्नर श्रेष्ठं धाःसा थः विरुद्ध छानविन सुरु जूगु थःत राष्ट्र बैंकया गभर्नर जुइगु पाखें वांछ्वयेगु निंतिं चलखेल जूगु खँ धयाच्वंगु दु ।

श्रेष्ठविरुद्ध अर्थमन्त्री युवराज खतिवडाया चाहना कथं छानविन सुरु जूगु खँ पिहां वयाच्वंगु दु । अर्थमन्त्री खतिवडाया इच्छा कथं सम्पत्ति शुद्धिकरण विभागं प्रधानमन्त्री कार्यालयय् छानविनिया निंतिं इनाप याःगु खँ धाःगु दु । विभागया इनापया आधारय् मन्त्रिपरिषदं राष्ट्र बैंकयात छानविन यायेत निर्देशन बिउगु खःसा थ्व लिपा बैंकया संचालक श्रीराम पौडेलया संयोजकत्वय् रामजी रेग्मी व सुवोधकुमार कर्ण दुथ्याःगु समिति दयेकूगु खः ।

श्रेष्ठ विरुद्ध सम्पत्ति शुद्धिकरणया लिसें पदीय आचरण कथं ज्या मयाःगु, बैंक व देय्या वित्तीय प्रणालीयात हे प्रभावित याइगु ज्या याःगु व फर्जि भ्वँ तयारी यानाः अनधिकृत सुविधा काःगु द्वपं लानाच्वंगु दु । न्हूम्ह डेपुटी गभर्नरया चर्चा छानविन लिपा श्रेष्ठयात बर्खास्त यायेफुगु खँ धाःगु दु । छानविन समितिं लछिया दुने प्रतिवेदन बीमाः ।

श्रेष्ठयात बर्खास्त हे यायेगु ताः तयाः हे छानविन सुरु जूगु खँ पिहां वयाच्वंगु दु । अथे जूगुलिं श्रेष्ठया बर्खास्ती लिपा सु डेपुटी गभर्नर जुइ धयागु नं चर्चा सुरु जुइधुंकूगु दु । न्हूम्ह डेपुटी गभर्नरं श्रेष्ठया ल्यंदुगु कार्यकाल बराबर दत्या जक डेपुटी गभर्नर जुया ज्या याये खनी । आः डेपुटी गभर्नर जुइगु चर्चाय् दकलय् न्ह्यः बैकया वरिष्ठ निर्देशक लक्ष्मीप्रपन्न निरौलाया नां वयाच्वंगु दु ।

निरौला थौंकन्हय् बैंकया मुद्रा व्यवस्थापन विभागय् वरिष्ठ कार्यकारी निर्देशक कथं ज्या यानाच्वंगु दु । अथेहे मेम्ह वरिष्ठ निर्देशक प्रकाशकुमार श्रेष्ठया नां नं न्ह्यःने वयाच्वंगु दु । वय्कः प्रदेश ५ सरकारया योजना आयोगया उपाध्यक्ष जुयादीधुंकूम्ह खः । वय्कःया लिसें नियमन विभागया देवकुमार ढकालया नां चर्चाय् वयाच्वंगु दु ।

डेपुटी गभर्नर नियुक्तीया निंतिं गभर्नरंं निम्हेसिया नां सिफारिस यायेमाः । थौंकन्हय् बैंकय् झिंन्हय्म्ह कार्यकारि निर्देशक दु । डेपुटी गभर्नर जुइम्ह दकलय् वरिष्ठम्हेसित हे दयेकेमाः धयागु धाःसा मदु ।

सम्बन्धित बुखँ

LEAVE YOUR COMMENTS