तःननि दाफा खलःया शिक्षा अभिमुखीकरण ज्याझ्वः

किपू (नेपालभाषा टाइम्स)- तःननि दाफा खलःया ग्वसालय् एसइइ व प्लस टुया विद्यार्थीतय् निंतिं शिक्षा अभिमुखीकरण ज्याझ्वः याःगु दु । किपू नगरपालिका १० वडाया सहकार्यय् वडाया हे सनस्टार क्लब व द लोकल्स किपूया सहआयोजनाय् एसइइ व प्लस टुया विद्यार्थीया निंति ‘करिअर टक–२०८०’ शिक्षा अभिमुखीकरण ज्याझ्वः याःगु खः ।

ज्याझ्वलय् वक्ताकथं झायादीपिं थीथी ख्यःया ल्याय्म्ह व्यक्तित्वपिंसंसफलताया निंतिं थःपिंसं यानागु संघर्ष, भोगाई, अनुभवलिसें भविष्यया बारे राय सुझाव सहितया नुगःखँ तयादीगु खः । उगु इलय् शिक्षा मन्त्रालयया उपसचिव मनिषा महर्जन, इपिग्राफिस्ट भरत महर्जन, भरत नाट्यमया नांजाःम्ह नृत्य कलाकार स्वजन रघुवंशी, संगीतकर्मी पुष्पा पलाञ्चोके, सिभिल इन्जिनियर रोशन सिंह महर्जन, आइटीया सुशान्त महर्जन, थिएटर कलाकार मनोज महर्जन, युट्युबल आशुतोष बाराही लगायतं थःपिनिगु अनुभवया बारे कनादीगु खः ।

वक्तातय्सं विद्यार्थीयात सल्लाह सुझाव बीगु नापं थीथी पक्षय् सकारात्मक खँ तयादीगु खःसा वय्कःपिंसं विद्यार्थीतय्त थःपिनिगु रुचि कथंया विषय कयाः अध्ययन यायेमाःगु खँय् बः बियादिसं थथे जुल धाःसा जक लक्ष्य प्राप्त यायेत सहज जुइ धयादिल । अध्ययनय् ध्यान केन्द्रीत यायेत इनाप यासें वय्कःपिंसं सर्वोत्कृष्ट ल्याः हयेवं विज्ञान हे ब्वनेमाः धइगु मानसिकता तये मजिउ, धासें थःगु रुचि कथंया विषयय् ध्यान केन्द्रीत यानाः अध्ययन यायेमाःगु खँ धयादीगु दु । थःगु रुचिकथंया विषय अध्ययन याना वन धाःसा अवसरया आपालं लुखा चालीगु खँय् नं ध्यानाकर्षण याकूगु खः ।

ग्वसाः खलः दाफा खललिसें सह आयोजक सनस्टार क्लब व द लोकल्स किपुलिं एसइइ व प्लस टुया विद्यार्थीया दथुइ खने दयाच्वंगु अन्यौलता चिइकाः दिमागी परिस्थितियात ‘ब्रेन वास’ यायेकथं उकथंया अभिमुखीकरण ज्याझ्वः यानागु जानकारी बिउगु दु ।

दाफा खलःया नायः दिलिपकुमार महर्जनया सभापतित्वय् जूगु ज्याझ्वलय् किपू नगरपालिकाया उपप्रमुख शुभलक्ष्मी शाक्य (सुनिता) मूपाहांकथं झायादीगु खःसा द लोकल्स किपूया नायः निर्जला महर्जनं लसकुस यानादीगु खः ।