एनओएया १७ क्वःगु दँमुँज्या

येँ – नेवाः अर्गनाइजेसन अफ अमेरिका (एनओए)या झिंन्हय्क्वःगु दँमुँज्या अमेरिकाया राजधानी वाशिंगटन डि.सी.इ जुल ।
नेपाःया राष्ट्रिय म्येँ व नेवाः राष्ट्रिय म्येँ नापं अमेरिकाया राष्ट्रिय म्येँ हायेकाः शुरु जूगु दँमुँज्याय् नांजाःम्ह पर्यटन व्यवसायी अम्बिका श्रेष्ठ मूपाहांकथं झायादीगु खः ।

ज्याझ्वःया उलेज्या मूपाहां श्रेष्ठ व नेपाःया राजदूत कार्कीं मंकाः कथं त्वाः देवाय् मत च्याकाः यानादीगु खः । ज्याझ्वलय् विशेष पाहांकथं नेपाःया निंतिं अमेरिकाया पुलांम्ह राजदूत स्कट एच डेलिसी, वल्र्ड नेवाः अर्गनाइजेसनया नायः सिजन श्रेष्ठ व नेपालभाषाया नांजाःम्ह कवयित्री प्रतिसरा साय्मिया झायादीगु खः ।

एनओएया न्हापांम्ह न्वकु पुष्कर प्रजापतिं लसकुस यासें अर्गनाइजेसनपाखें जगतसुन्दर ब्वनेकुथिया ब्वँमिपिंत बिया वयाच्वंगु छात्रवृत्ति ज्याझ्वःया पूवंक विवरण बियादीगु खः । संस्थाया मूछ्याञ्जे महिन्द्र प्रधानं संस्थाया वार्षिक प्रगति प्रतिवेदन व दांभरिं राजेशलाल श्रेष्ठं आर्थिक प्रतिवेदन न्ह्यब्वयादीगु उगु ज्याझ्वलय् एनओएया ‘लसकुस’ ख्वाःपौ मूपाहां व विशेष पाहांपिंसं मंकाःकथं पितब्वज्या यानादीगु खः ।

अथे हे ज्याझ्वलय् थःथःगु थासं थीथीकथंया च्वछायेबहगु ज्या यानादीपिं संस्थाया दुजःपिंत हनेगु नापं जीवंकाःछि दुजःपौ नं लःल्हाःगु खः । ज्याझ्वःया मूपाहां व विशेष पाहांलिसें संस्थाया मय्जु बबिता श्रेष्ठं नं थःथःगु नुगःखँ प्वंकादीगु ज्याझ्वलय् एनओएया ज्यासना पुचःया दुजः उदय श्रेष्ठं सुभाय् देछानादीगु खः ।

ज्याझ्वःया न्हापांगु ब्व औपचारिक रुपं क्वचायेवं निगूगु ब्वकथं सांस्कृतिक ज्याझ्वः न्ह्यब्वःगु खः । सांस्कृतिक ज्याझ्वलय् नेपालं झायादीम्ह नांजाम्ह् गितारवादक अनिल शाहीलगायत मेमेपिं आपालं कलाकारतय्सं थःथःगु सांस्कृतिक प्रस्तुति न्ह्यब्वयादीगु खः ।

सम्बन्धित बुखँ

LEAVE YOUR COMMENTS