बुंगद्यःया जात्रा नाप स्वापू दुगु लुभुया जात्रा
बुंगद्यःया जात्रा स्वनिगःया थीथी लागाया नेवाःतय् नाप नं स्वापू दयाच्वंगु दुसा यल जिल्ला दुने हे लाःगु लुभुया नेवाःतय्गु ला झन विशेष कथंया स्वापू दयाच्वंगु खनेदु । बुंगद्यःया रथ जात्राया झ्वलय् गुगु कथं गाबहाःयाः, नुगःयाः अले लगंयाः न्यायेकी उगु हे कथं लुभुइ नं द्यःखः कुबिया जात्रा यानाः याः न्यायेकीगु चलन दु ।लुभुइ जात्राया झ्वलय् झ्वःलाक्क स्वन्हु तक स्वंगू याः धकाः न्यायेकी । बछलाथ्व चौथि कुन्हु गाःबहाःयाः, पंचमी कुन्हु नुगःयाः अले खष्ठी कुन्हु लगंयाः न्यायेकी ।
यलय् न्यायेकीगुसिबें नं पाःगु कथं लुभुइ याः न्यायेकेगु याइ । गाःबहाःयाः कुन्हु सतलय्, अले नुगःयाः कुन्हु तःगः तुं लागाय् व लगंयाः कुन्हु महालक्ष्मी द्यःयाथाय् याः न्यायेकी । याः न्यायेकीगु इलय् लुभुया श्रेष्ठ परिवारपिं मध्ये न्हय्म्ह थकालिपिं झ्वःलाक्क च्वनी अले दर्शनधारीतय्सं म्वायेली पुइ । मेमेपिंसं थकालिपिंत सिसाबुसा नापं थीथी कथंया समान लःल्हानाः भागि याना वनी । उकियात हे याः न्यायेकेगु धाइ ।
अथे लुभुइ याः न्यायेकेगु धइगु लुभुया जात्राया द्यःखः थ्यनीगु छु छु लागाय् खः उगु उगु हे लागाय् न्यायेकीगु खः । यलय् बुंगद्यःया रथ साला यंकीगु जुयाः गनं गनं थानाः छुं दिं कायेफु तर लुभुइ धाःसा द्यःखः जात्रा जुया लगातार रूपं हे स्वन्हु तक निश्चित निश्चित लागाय् थ्यनीगु जुया याः अवश्य न्याइ । उकिं यलय् याः मन्यासां नं लुभुइ याः न्याइ धायेगु चलन नं दु ।
बुंगद्यःया रथया न्ह्यःने च्वंगु जः पाखेया घःचाः धइगु लुभुया भैरव खः धाइ ।
उम्ह भैरवयात हे नन्द कुन्द भैरव धाइ । अले बुंगद्यःयात कुबिया हःपिं प्यम्ह भैरव मध्ये छम्ह लुभुया व हे भैरव खः धाइ । बुंगद्यःया रथ लुँहितिइ थ्यनेवं लुभुयापिं थकालि विशेष कथंया पुजा वनेमाःगु नं थौं तक नं चलन दु । थुगु कथं बुंगद्यःया रथ जात्रा नाप लुभुया जात्रा नं स्वनाच्वंगु दु ।
ऐतिहासिक बस्ती लुभु
यलया लगंख्यलं ५ किलो मिटर पूर्वपाखें च्वंगु नेवाःतय्गु मौलिक वस्ती खः– लुभु । लुभुइ नेवाः दुने नं श्रेष्ठतय्गु अप्वः बाहुल्यता दुसा अथे हे महर्जन, राजथला, खड्गी, दर्शनधारी, पुतवार, नापित, नकःमि व बज्राचार्यतय्गु मंकाः बसोबास जुयाच्वंगु दु । देवमाला बंशावलीइ नेपाल संवत् ७०६÷७ पाखे लुभुया स्थापना याःगु खः धकाः उल्लेख यानातःगु दुसा अबलेनिसें हे लुभुया महालक्ष्मी द्यःया जात्रा सुरु याःगु धकाः उल्लेख यानातःगु दु ।
देवमाला वंशावलीइ अथे च्वयातःगु जूसां नं लुभुया क्वय्लाछिइ च्वंगु नारायण देगःया छगू शिलापत्रय् धाःसा नेपाल संवत् ५७२ च्वयातःगु खनेदु । उकिं देवमाला वंशावलीइ उल्लेख जुयाच्वंगुसिबें न्हापांनिसें हे लुभुया वस्ती विस्तार जुइ धुंकूगु खयेमाः धकाः अःपुक अनुमान यायेछिं ।
अथे हे लुभुया नांया बारे शिव सिंह मल्लया कला गंगा महारानीं लुँया भु मियाः हे वस्ती विस्तार याःगु जुया लुभु धाःगु धाइ । उगु हे कथं लुभुया छगू पुलांगु म्येय् धाःसा अन्न यक्वः सःगु जुयाः लुँबु धाःगु धकाः च्वयातःगु दु । लुभुया नांयात कयाः थुगु कथंया निगू धापू खनेदु ।
लुभुया जात्रा
लुभुइ निखः द्यःखः जात्रा याइगु खः । छखः द्यःखतय् महालक्ष्मीयात प्रमुख द्यः कथं नालाः दथुइ तयाः जवय् गणेद्यः व खवय् कुमार तयाः जात्रा याइ । अथेहे मेगु खतय् भैलःद्यःयात प्रमुख द्यः कथं नालाः दथुइ तयाः जवय् गणेद्यः व खवय् कुमारी द्यःयात तयाः जात्रा याइ । बछलाथ्व चौथिनिसें लुभुइ जात्रा सुरु जुइ । नाय्खिं बाजं, धिमे थानाः, बासुरी पुयाः सांस्कृतिक बाजं सहित जात्रा जुइ । जात्राया झ्वलय् चौथि कुन्हु महालक्ष्मी द्यः दुगु लाछिंनिसें पीगं त्वालय् तक जात्रा याइ ।
उकुन्हु हे महालक्ष्मी द्यःया मांयाथाय् तकं यंकेगु याइ । अथे हे पञ्चमि कुन्हु पीगं लागांनिसें पाउलि त्वाः तक जात्रा याइ । उगु इलय् देसं पिनेच्वंपिं मेमेगु जातीयापिंसं नं जात्रा माने याइ । अथे हे षष्ठी कुन्हु पाउली त्वालंनिसें नासः त्वाः तक, सप्तमी कुन्हु नासः त्वालंनिसें तःग्वः तुं जुया न्हुछेँफः तक जात्रा याइ । अष्टमी कुन्हु क्वय्लाछिइ सरकारी पुजा याइ । सांस्कृतिक बाजं थाना सरकारया प्रतिनिधि कथं भंसारीया पुजा जुइ ।
अले पुजा क्वचाये धुंकाः हाकनं भंसारीयात बाजं थानाः तःवनेगु याइ । अथे हे नवःमि कुन्ह क्वय्लाछि व च्वय्लाछिया दथुइ तया पुजा याइसा दशमी कुन्हु क्वाथं पुजा वनेगु याइ । अले क्वाथ लिक्क च्वंगु महालक्ष्मी द्यःया थःछेँपाखें नं पुजा याइगु चलन दु ।
भ्वंया आकाश भैरवया विशेष जात्रा
लुभुइ जुइगु छगू कथंया बिस्कं कथंया जात्रा धइगु भ्वंया आकाश भैरवया जात्रा खः । खटकुनय् तयातःगु भैरवया चित्र न्वलय् तया कुबिया तइगु खः । द्यः खतय् दइगु अवस्थाय् दुने हे तयातइ अले द्यः खतय् हे च्वना न्वःकुबिया च्वनीगु खःसा द्यःखः न्ह्याकीगु इलय् धाःसा न्वः नापं आकाश भैरवयात पिने हयेगु याइ । अले हाकनं द्यःखः दिकेवं व हे द्यःखतय् च्वनाः कुबिया च्वनेमाःगु चलन दु ।
यलया चित्रकारतय्सं भ्वँतय् च्वया तइगु थुगु भैरवयात गबलें नं दिके मजिउ धाइ । अनया महर्जनतय्सं चच्छि न्हिच्छि कुबिया तयेमाःगु चलन दु । न्वलय् तयाः कुबिया तइगु खः । बछलाथ्व पञ्चमीया दिनंनिसें भैरवया जात्रा जुइ । महालक्ष्मी व भैलः द्यःया खः गन गन जात्रा यानाः यंकी दशमी कुन्हु तक अन अन हे आकाश भैरवयात यंकेगु याइ । अले दशमी कुन्ह भैलः द्यवं बिदा यानाः ध्वाकां पिने वाये यंकेगु याइ ।
आकाश भैरव दुगु इलय् सुनां नं धार्मिक मान्यता कथं बौ वाये माल धाःसा व हे भ्वंयागु आकाश भैरवयाथाय् वायेमाःगु मान्यता दु । थुगु कथं विशेष प्रकारया जात्रा लुभुइ खने दु ।न्ह्यागु हे जूसां लुभुया जात्रा धइगु विशेषता दुगु अले लुभुया थःगु हे म्हसीका पिब्वइगु कथंया जात्रा खः । थुगु जात्रा हे लुभुया नेवाःतय्गु दकलय् तःधंगु जात्रा खः । मल्लकालंनिसें सुरु जूगु कथं नालातःगु थुगु जात्रा धइगु बुंगद्यःया जात्राया इलय् हे जुइगु अले बुंगद्यःया जात्रा नाप नं स्वापू दयाच्वंगुलिं अझ अप्वः महत्वं जायाच्वंगु खनेदु ।
LEAVE YOUR COMMENTS