छ्यं स्याइगुया थीथी कारण

छ्यं स्याइगु धयागु न्ह्याम्हेसितं जुइयः । थ्व छगू आम समस्या खः । न्ह्याम्ह मनू नं जीवनय् छ्यं स्याइगु पाखें पीडत जु हे जुइ । छ्यं स्याइगुया कारण थीथी दु । साधारणत दृष्टिदोषं निसें साइनसया कारणं तकं छ्यं स्याइसा गम्भीर कारणय् मस्तिष्कय् जुइगु ट्युमरं यानाः नं छ्यं स्याइ ।

थौंकन्हय्या लिमलाःगु ई, दौडधूपया जीवनशैलीया कारणं अप्वःसित छ्यं स्याइगु जुयाच्वंगु दु । छ्यं स्याइगु थीथी कारणय् तनाव मू समस्या कथं न्ह्यःने वयाच्वगु दु । थौंकन्हय्या इलय् सकसित धयाथें तनावं यानाः छ्यं स्याइगु जुयाच्वंगु दु ।

उच्च रक्तचाप (हाइ ब्लडप्रेसर)या कारणं नं छ्यं स्याइ । उच्च रक्तचाप सामान्यत ला ४० दँ दयेधुंकाः जुइगु खः, तर थौंकन्हय् म्हो उमेरयापिंत नं उच्च रक्तचापं पीडित यानाच्वंगु दु ।

म्हो रक्तचापय् नं छ्यं स्याइ । थुकिया लिसें सेखं चाइगु, ख्वाउँ चाइगु अथवा साइनसय् नं छ्यं स्याइगु जुइ ।

छ्यं स्याइगु पाखें बचे जुइगु खःसा तनावयात म्हो यानातये फयेमा । तनावया कारणं ब्वह, गःपःया लिसें क्वतलय् संकुचन जुइ, गुकिं यानाः छ्यं स्याइगु जु । म्हो द्यनेगु, इलय् हे मनयेगु यात धाःसा लिसें अय्लाः थ्वँ अप्वः त्वनीगु कारणं नं छ्यं सइ । चकलेट व पनीर थेंज्याःगु चीज यक्व नलकि नं छ्यं स्याइगु जुफु । अप्वः थें कफी त्वनीपिं मनूतय्त इलय् हे कफी त्वने मखन धायेगु नं छ्यं स्याये यः ।

छुं छुं इलय् मस्तिष्कय् ट्युमर जुल धायेगु नं छ्यं स्याइ, तर थज्याःगु समस्या म्हो हे जक खनेद ।

छ्यं स्याइगु म्हो यायेगु खःसा थौकन्हय् दौडधुप व तनावय् जुइपिंसं दिमाग शान्त यानातये फयेकेमाः, अले फयांफक्व तनावमुक्त जुयाच्वनेमाः । थुकिया निंतिं सुथय् सुथय् चाःहिलेगु, ध्यान यायेगु, व्यायम यायेगु यायेमाः । थुकिया लिसें मल्टिभिटामिन व एन्टिअक्सिडे न्स वासः नं नयेफइ ।

यदि ताःई तक छ्यं स्याइगु जुयाच्वन धाःसा विशेषज्ञ चिकित्सक हे क्यना स्वयेमाः । चिकित्सकयात क्यनाः सिटी स्क्यान यात धाःसा छ्यं स्याइगुया मू कारण सीकेफइ । थुकिया लिसें नियमित रुपं मिखा जाँच याकाच्वनेमाः, लिसें दृष्टिदोष दुसा मिखाया निंतिं सही नम्बरया चश्मा तयेगु यायेमाः ।