ने. सं. ११४४ कौलाथ्व तृतीया -

हलिउडया टप टेन हरर फिल्म

हरर फिल्म धाल कि स्वइपिं स्वकुमि ग्याग्यां स्वइ । गुलि सितुपातु वंक ख्यायेफु उलि हे हरर फिल्मं स्वकुमिया नुगः सालेफइ । आःतक सीदु कथं साईलेण्ट फिल्मया युगय् सन् १८९० पाखे पिहां वःगु जर्जेस मिलियसं दयेकूगु “ले मेन्वा डु डियाबल” नांयागु चीहाकःगु फिल्मयात दकलय् न्हापांगु हरर फिल्मया रुपय् कयातःगु दुसा व धुंकाः सन् १८९८ पाखे “द केभ अफ डेमोनस” नांयागु शर्ट फिल्म पिदन । फिचर फिल्मया संसारय् दकलय् न्हापांगु हरर फिल्मया रुपय् “फ्रेंकस्टीन” यात कयातःगु दु । थ्व फिल्म सन् १९१० पाखे पिदंगु फिल्म खः । व धुंकाः सन् १९२२ पाखे पिदंगु “नोसफेराटु” नं छगू ज्वःमदुगु हरर फिल्म खः । थुकथं संसारय् फिल्म निर्माणया इतिहास शुरु जुसांनिसें हे शुरु जूगुु हरर फिल्म आः तक नं उत्तिकं हे लोकंह्वानाच्वंगु दनि । हरर फिल्मया ख्यलय् ‘ब्योमस्ट्रोक ड्राकुला’ नं छम्ह लोकंह्वाःम्ह पात्र खः । हरर फिल्मया इतिहासय् ‘डा. जेकील एण्ड मि. हाइड’ नं छगू लोकंह्वाःगु फिल्म खःसा सन् १९३१ य् पिदंगु थ्व फिल्मय् फ्रेडरीक मार्च नांयाम्ह कलाकारं मेन रोल म्हितातःगु दु । लिपा वनाः थ्वहे बाखंयात ज्वनाः भारतय् ‘चेहरे पे चेहरा’ व ‘जानी दुश्मन’ नांयागु निगू हिन्दी फिल्म पिदंगु दुसा थ्व निगुलिं फिल्मय् संजीव कुमारं छगू इलय् भिंम्ह मनू व मेगु इलय् ग्यानापुसे च्वंम्ह मनू जुयाः म्हितातःगु दु । थ्व निगुलिं फिल्म लोकंह्वाःगु फिल्म खः । थथे लोकंह्वाःगु हरर फिल्मया ख्यलय् द्वलंद्वः हरर फिल्म पिहां वये धुंकल । अज्याःगु फिल्म मध्ये टप टेनया दर्जाय् लानाच्वंगु हरर फिल्मयाबारे थन छक्वः चर्चा यायेगु जुइ ।
द फ्लाई
डेविड क्रोनेन्बर्गं दयेकूगु ‘द फ्लाई’ नांयागु हरर फिल्मय् जेफ गोल्डब्लमं मेन रोल म्हितातःगु दु । साइन्स फिक्शन कथं नं कयातःगु थ्व फिल्मय् छम्ह वैज्ञानिकं दयेकूगु छगू मेशिनय् भुजिं छम्ह फसे जुइगु व व धुंकाः मनू व भुजिंया रुप छगुलिइ हे दुथ्याःम्ह जीवया हुनिं फैलय् जुइगु त्रास हे थ्व फिल्मया मू बाखं खः । मनू व भुजिं ल्वाकज्याःम्ह पात्रया रचना थ्व फिल्मया छगू ज्वःमदुगु पक्ष खःसा वं न्यंकूगु त्रास मेगु च्वछायेबहगु पक्ष खः । थुकी हलिउड स्टार जेफ गोल्डब्लमं यानातःगु अभिनय नं थ्व फिल्मया तारीफ यायेबहगु खँ खः । थुकथं सन् १९८६ पाखे पिदंगु थ्व फिल्म आतक नं छगू ज्वःमदुगु हरर फिल्मया रुपय् कयातःगु दु ।
द ब्लेयर विच प्रोजेक्ट
हरर फिल्मय् भिजुअल इफेक्ट अप्वः म्हितेमालीगुलिं अज्याःगु फिल्मया बजेट अप्वः जुइगु स्वाभाविक खः, तर गुलिखे अज्याःगु हरर फिल्म नं दु, गुगु फिल्मया बजेट तसकं म्हो जक जुयाच्वनी । अज्याःगु हरर फिल्मय् ‘पारानर्मल एक्टिभिटी’ नांयागु फिल्म नं लाःसा ‘द ब्लेयर विच प्रोजेक्ट’ नं छगू अज्याःगु हे म्हो जक बजेटं तयार जूगु हरर फिल्म खः । थ्व फिल्मया बजेट जम्मा ६० लाख डलरजक तूगु खःसा थ्व फिल्मं मुक्कं २ करोड ४८ लाख डलर कमे यानाः रेकर्ड तःगु खः । थ्व छगू सत्य घटनाया लिधंसाय् दयेका तःगु हरर फिल्म खः । आःतक नं थ्व फिल्मया चर्चा इलय्ब्यलय् जुयांतुं च्वं ।

रोजमेरीज बेबी
हरर फिल्मया ख्यलय् ‘रोजमेरीज बेबी’यात छगू बिस्कं दर्जा बियातःगु दु । सन् १९६८ इ पिदंगु थ्व फिल्मया निर्देशक रोमन पोलन्स्की खः । थ्व फिल्मय् हलिउडया नांजाःम्ह हिरोइन मिया फर्रोया मेन रोल दु । थुकी हिरोइनया मचा हे प्रेतात्मा खः धकाः धाइबलय् वयागु जीवनय् वइगु कष्टयात क्यनातःगु दुसा न्यय्दँ न्ह्यःया थ्व हरर फिल्मयात आःतक नं छगू ज्वःमदुगु हरर फिल्मया रुपय् कयातःगु दनि ।

हलोविन
‘हलोविन’ धइगु अमेरिकाया छगू हरर नखः खः । थ्व इलय् मनूतसें थीथी ग्यानापुसे च्वंगु ख्वाःपाः पुनाः पार्टीइ ब्वति काइ । थज्याःगु उत्सवया लिउने सुलाच्वंगु ग्यानापुगु लकसयात क्यनातःगु “हलोविन” नांयागु फिल्मयात हलिउडया हरर फिल्मया इतिहासया छगू बांलाःगु फिल्म कथं कयातःगु दु । थ्व फिल्मय् मानसिक अस्पतालं पिहांवःम्ह छम्ह विक्षिप्त मनुखं न्यंकूगुु आतंकया माध्यमं हररया लकस ब्वलंकातःगु दु ।

द ओमेन
सन् १९७० पाखे पिदंगु थ्व ‘द ओमेन’ नांयागु हरर फिल्म नं हलिउडया छगू क्लासिक हरर फिल्म खः । थुकी मू पात्रया थः हे मचाया दुने मभिंगु आत्मा दुबिनाच्वंगु व वं हे अन जःखः मनूत स्यानाच्वंगु क्यनातःगु दु ।
द टेक्सास चेन् श मासाकेर
‘द टेक्सास चेन् श मासाकेर’ नं हरर फिल्मया ख्यलय् छगू नांदंगु फिल्म खः । थ्व फिल्मय् ग्यानापुम्ह पात्र लेदरफेसयात भिलेनया रुपय् क्यनातःगु दुसा आःतक हलिउडया फिल्म इतिहासय् लेदरफेसयात दकलय् ग्यानापुम्ह भिलेन कथं कयातःगु दनि । सन् १९७४ य् पिदंगु ‘द टेक्सास चेन् श मासाकेर’ तसकं लोकंह्वाःगु हरर फिल्म खःसा थ्व फिल्मया सिक्वेल नं यक्व हे पिहां वःगु खः । उकी मध्ये २००४ य् पिदंगु ‘द टेक्सास चेन् श मासाकेर ः द नेक्स्ट जेनरेशन’ नं छगू बांलाःगु हरर फिल्म खः ।
द शाइनिंग
सन् १९८० इ पिदंगु ‘द शाइनिंग’ नांयागु फिल्म स्टाएनले कुब्रिकं दयेकूगु खः । थुकी हलिउडया नांजाःम्ह हिरो ज्याक निकोल्सनं मेन रोल म्हितातःगु दु । गुबलें छम्ह सामान्य मनू गुबलें तसकं हे ग्यानापुम्ह मनूया रुपय् ज्याक निकोल्सनं थ्व फिल्मय् साप हे तारीफ यायेबह जुइक अभिनय यानातःगु दु । वयागु धिसिलाःगु अभिनयया कारणं नं थ्व फिल्मया चर्चा अप्वःगु खःसा थुकी क्यनातःगु हररया लु नं तसकं हे तारीफ यायेबहजू धाइ ।
साइको
सस्पेंस थ्रिलर फिल्मया ख्यलय् ज्वःमदुगु योगदान दुम्ह फिल्ममेकर खः अल्फ्रेड हिच्कक । विशेष यानाः रहस्यं जाःगु थ्रिलर फिल्म जक दयेकीम्ह अल्फ्रेड हिच्ककं दयेकूगु ‘साइको’ नांयागु हरर फिल्मयात आपाःसिनं कुंखिउँगु खः कि हिच्कक थेंज्याःम्हेसिनं थज्याःगु फिल्म दयेके मजिउ धकाः, तर फिल्म स्वकुमितय् दथुइ धाःसा साप हे लोकंह्वाःबलय् आलोचना याःपिनिगु म्हुतुप्वाः बन्द जूगु खः । थुकी एन्थोनि पर्किन्स नांयाम्ह हलिउड हिरो नं छम्ह अज्याःम्ह मनूया रोल म्हितातःगु दु, गुम्हेसिनं भुजिं छम्ह नं स्याये फइमखु । तर वं हे वयागु मोटेलय् बासं च्वं वःपिंत स्याइगु हे थ्व फिल्मया मू चु खः । थ्व फिल्मय् क्यनातःगु म्वःल्हुइगु शावरया लु थुलि ग्यानापुसे च्वंकि लिपा वनाः गुलिखे मेमेगु हरर फिल्मय् नं थज्याःगु शावरया लु तयेगु यानाहःगु खः ।
अ नाइटमेएर इन् एल्मस्ट्रीट
सन् १९८० पाखे पिदंगु ‘अ नाइटमेएर इन् एल्मस्ट्रीट’ नं छगू ज्वःमदुगु हरर फिल्म खः । थुकी रोबर्ट एन्गुल्ड नांयाम्ह हलिउडया नांजाःम्ह हिरोनं फ्रेडी क्रुगर नांयाम्ह सिरियल किलरया रोल म्हितातःगु दु । थुकी फ्रेडी नांयाम्ह मभिंम्ह पात्रं थःगु ल्हाःयात न्याकु हाकः ताहाकः याइगु लु खनाः आपालं स्वकुमिया म्ह हे चेंचेंमिंगु खःसा उगु लुयात हरर फिल्मया इतिहासय् बेस्ट हरर सिन कथं कयातःगु दु । अथे हे तुं फोनया रिसिभरं म्ये लुयाहइगु लुयात नं बेस्ट हरर सिन कथं कयातःगु दु । थ्व फिल्मया निर्देशक वेस क्रेभन खः ।

द एक्जोर्सिस्ट
हरर फिल्मया ख्यलय् नुगः क्वसाःपिं आपाःसिनं स्वःगु फिल्म धइगु ‘द एक्जार्सिस्ट’ खः । सन् १९७३ य् रिलिज जूगु फिल्म उगु ईया छगू तसकं अप्व दां कमे याःगु हरर फिल्म खः । हरर फिल्या टप टेनया धलखय् थ्व फिल्म दकलय् न्ह्यःने लानाच्वंगु दु । यानिकि थ्व फिल्मयात नम्बर वन हरर फिल्मया कथं कयातःगु दु । थ्व फिल्म रिलिज जूगु हे पीन्यादँ दयेधुंकलसां थुकिया स्वकुमि आः तक नं म्हो मजूनि । आतक नं युट्युबय् दकलय् अप्वःसिनं स्वया वयाच्वंगु दनि । विलियम् फ्रेडकिन्सं दयेकूगु थ्व फिल्मया सिक्वेल नं तःगू हे पिहां वःगु दु । तर न्हापांगु भर्सनयात आःतक नं त्याकेमफुनि धाइ । थ्वहे फिल्मया नकल यानाः बलिउडय् नं ‘जादु टोना’ नांयागु छगू हरर फिल्म दयेकूगु दु । तर उगु हिन्दी फिल्मं स्वकुमिया नुगः त्याके मफुत ।