प्रधानमन्त्रीयात नेवाःतय्गु न्यागू न्ह्यसः

येँ – स्वनिगःया आदिवासी नेवाःतय्सं प्रधानमन्त्री केपी शर्मा ओलीयात लुमन्ति पौया नापनापं जवाफदेहिता पौ धकाः नेवाः अधिकारलिसे स्वाःगु न्यागू न्ह्यसः न्यंगु दु ।

येँ, यल, ख्वप व काभ्रे जिल्लाया सिडियो मार्फत नेवाःतय्सं प्रधानमन्त्रीयात म्हिगः सोमवाः न्ह्यसःपौ बिउगु खः । नेपाल लिपिं नेपालभाषां, देवनागरि लिपिं खय् भासं अले रोमन लिपिं अंग्रेजी भासं च्वयातःगु उगु न्ह्यसःपाखें बहुभाषी कथं प्रमयात बिउगु खः ।
नेवाःतय्गु राष्ट्रिय संगठन नेवाः देय् दबूया संयोजनय् नेवाः स्वायत्त राज्य मंकाः संघर्ष समितिया घटकत, थीथी नेवाः जातीय खलः पुचः नापं नेवाः अधिकारया नितिं आन्दोलनरत थीथी मोर्चा व अभियानपाखें मंकाः कथं प्रधानमन्त्रीयात पौ हे च्वयाः उगु न्यागू न्ह्यसः न्यनेगु ज्या याःगु खः ।

नेवाःतय्सं प्रमयात न्यंगु न्यागू न्ह्यसः थुकथं दुः १) नेवाः भूमि, संस्कृति, सम्पदा व सभ्यता संरक्षण यायेत समुदायलिसे सहकार्य राज्यं यायेमाः, तर विडम्वना थुकी हे मदिक्क थीथी त्वहः तया राज्यस्तरं हे प्रहार छाय् यानाच्वंगु खः ?, २) आइएलओ १६९ व युएनड्रिपं बिउगु आदिवासी नेवाःतय्गु अधिकार छाय् सुनिश्चित याये मफुगु खः ?, ३) संविधानय् दुगु स्वायत्त क्षेत्र, संरक्षित क्षेत्र व विशेष क्षेत्र कार्यान्वयन छाय् मयाःगु खः ?, ४) सम्मानित सर्वोच्च अदालतया पूर्ण इजलासं बिउगु निर्देशनात्मक आदेशयात अवहेलना याना जनताया छेँ जग्गाय् छाय् डोजर आतंक जुयाच्वंगु खः ? व ५) पहिचान, पहुँच व प्रतिनिधित्व सम्बन्धी समुदायया जायज माग व अपेक्षायात आः तक नं संबिधान संशोधन यानाः राज्यं छाय् सुनिश्चित यायेगु ज्या मयानाच्वंगु खः ?

न्ह्यसः पौ बीगु निंतिं येँ, यल, ख्वप नापं काभ्रेय् बिस्कं बिस्कं जुलुस पिकयाः सिडियो ज्याकुथी वंगु खः । नेवाः प्रतिनिधितय्सं सीडीओयात हे पौ लःल्हाःगु खः । प्रधानमन्त्रीयात बिउगु उगु पौयात कयाः लिपा प्रधानमन्त्रीयात नापलायेगु नापं उगु पौया बोधार्थ आइएलओया ज्याकू, युनिस्कोया ज्याकू, राजनीतिक दलत, प्रदेश सरकारंनिसें स्थानीय सरकारयात तकं बीगु खँ धाःगु दु ।

सम्बन्धित बुखँ

LEAVE YOUR COMMENTS