भारतया खुसिबाः व चलखं नेपाःमित नं प्रभावित

बिबिसी- भारतया थीथी राज्यय् वःगु खुसिबाः व चलखय् तःम्ह नेपाःमि नं लाःगु दु । भारतस्थित नेपाली दूतावासं खुसिबाः व चलः वःथाय्यापिं नेपाःमितय् बारे जानकारी मुंकाच्वनागु खँ धाःगु दु ।

हिमाञ्चल राज्यया सिमलाय् वःगु चलखय् लानाः पश्चिम रुकुमया छगू हे परिवारया स्वम्ह सीगु पुष्टि जुइधुंकूगु दु । बिबिसी नेपाली सेवां धाःकथं सिमलाय् च्वंपिं वया थःथितिपिंसं अन च्वंपिं नेपाःमिपिंके ग्वाहालि कयाः स्वम्हेसियां सीम्ह नेपाः हयेत्यंगु दु । सिमलाय् वःगु चलखय् लानाः पश्चिम रुकुमया त्रिवेणी गाउँपालिका ९ या स्वम्हेसिया ज्यान वंगु खः । त्रिवेणी गापा ९ वडाया अध्यक्ष हरिबहादुर खड्कां धाःकथं कलाःभाःत व उपिं झिंन्हय्दँ दुम्ह कायया ज्यान वंगु खः ।

वडाध्यक्ष खड्कां धाःकथं भाःतम्ह न्हापां निसें अन मजदूरी यानाच्वंपिं खःसा कलाः व कायम्ह उखे वंगु लछि नं मदुनि । सिमलाय् हे च्वनाच्वंम्ह उमि तःधिकःम्ह काय धाःसा बचे जूगु खँ धाःगु दु ।

दिल्ली स्थित नेपाली दूतावासया प्रवक्ता रेवतीरमण पौडेलं हिमाञ्चल प्रदेशया थीथी थासय् च्वनाच्वंपिं नेपाःमितय्त सम्पर्क तयाच्वनागु खँ धाःगु दु । ‘जिमिसं अन च्वंपिं नेपाःमितय्के स्वापू तयाच्वनागु दु, तर उमित हे प्रभावित क्षेत्रय् गुलि नेपाःमित दु धयागु जानकारी मदुगुलिं बांलाक खँ सीकेफयाच्वंगु मदु’ पौडेलं बिबिसी नेपाली सेवालिसे खँ ल्हासें धाःगु दु ।

भारतय् छुं न्हि न्ह्यवनिसें मदिक्क वयाच्वंगु वां यानाः थाय्थासय् जनधनया क्षति यानाच्वंगु दु । मदिक्क वयाच्वंगु वां यानाः दिल्ली, हिमाञ्चल, उत्तराखण्ड, पञ्जाब, हरियाणा, जम्मु कश्मिर व राजस्थानया गुलिखे थाय् जलमग्न जूगु दु । खुसिबाः व चलखं यानाः भारतय् ४१ म्हेसिया ज्यान वनेधुंकूगु दु । थुपिं मध्ये झिंन्हय्म्ह हिमाञ्चल प्रदेशय् जक लाःगु दु । तसकं वा वयाच्वंगुलिं दिल्लीया गुलिखे स्कूल सोमवाः निसें बन्द जुयाच्वंगु दु ।

यमुना खुसिया लः खतराया तह स्वयां थहां वयेधुंकूगु दु । थुकिं यानाः डुबान जुइफुगु थाय्या द्वलंद्वः मनूतय्त सुरक्षित थासय् यंकेधुंकूगु दु ।

भारतीय मौसम विभागं दिल्लीइ वंगु ४० दँ लिपा दकलय् अप्वः वा वयाच्वंगु खँ धाःगु दु । दिल्लीइ सामान्यत न्हिं ८ निसें ९ मिलिमिटर वा वइगु खः । तर लिपांगु निन्हुया दुने अन १५३ मिलिमिटर वा वयेधुंकूगु दु । थन जुलाई १५– व १६ अझ वा वइगु अनुमान यानातःगु दु । उबलय् औसत ३० निसें ४० मिलिमिटर वा वइगु अनुमान दु ।