ज्यापु महागुथि नेपाः पश्चिम लागाया स्वक्वःगु अधिवेशन

येँ – ज्यापु महागुथि नेपाः पश्चिम लागाया स्वक्वःगु अधिवेशन वंगु शनिवाः जुल । अधिवेशनं महागुथिया पश्चिम लागाय् धनवीर महर्जनया हे नेतृत्वय् न्हूगु ज्यासना पुचः नं ल्यःगु दु । सर्वसम्मतिं ल्यःगु न्हूगु ज्यासना पुचलय् चन्द्रशेखर महर्जन न्वकु, सम्पूर्ण महर्जन छ्याञ्जे, शिशुपाल महर्जन दांभरिं व धवेन्द्र महर्जनयात लिउ दांभरिं ल्यःगु दु ।

अथे हे दुजलय् धनकृष्ण महर्जन, रमेश महर्जन, धनबहादुर महर्जन, राजेश महर्जन, ललिक महर्जन, दिनेश महर्जन, नेसन महर्जन, तेजमाया महर्जन, अष्टमाया महर्जन व सानु महर्जन च्वनादीगु दु । थ्व स्वयां न्ह्यः अधिवशेनय् मूपाहांकथं झायादीम्ह चन्द्रागिरि नगरपालिकाया प्रमुख घनश्याम गिरीं अधिवेशनया उलेज्या यासें भाषा, कला, संस्कृति, साहित्य देय्या सम्पत्ति खः धासें देय्या सम्पत्तिया संरक्षण यायेगु खःसा स्थानीय संस्कृति, सम्पदाया संरक्षण यायेमाः धयादिल ।

लिसें वय्कलं स्थानीय संस्कृति, सम्पदाया संरक्षण व संवद्र्धन यायेत नेवाः संग्रहालय चायेकेगु नं घोषणा यानादिल । महागुथिया केन्द्रीय नायः राजभाई जकःमिं साः कुबीपिं ज्यापुतय्सं आः देय् कुबी धयादिल । महागुथिया पश्चिम लागाया नायः धनवीर महर्जनं पश्चिम लागाया ज्यापु समुदाययात छधी यायेत सकल ज्यापुलिसें नेवाः समुदाययात हे थकायेगु निंतिं क्रियाशील जुयाच्वनेगु प्रतिवद्धता प्वंकादिल ।

स्थानीय तहया निर्वाचनय् निर्वाचित जुयादीपिं ज्यापु समुदायया न्याम्ह वडाअध्यक्षयात नं हनेज्या याःगु ज्याझ्वलय् नगरपालिकाया उपप्रमुख लिशा नकःमि, महागुथिया केन्द्रीय न्वकु सन्तु महर्जन लगायत आपालं प्रतिनिधितय् उपस्थिति दुगु खः ।