राष्ट्रिय ज्ञानमालाया पदाधिकारीपिंत हनालिसें क्षेत्रीय उपसमिति गठन

यल – श्री बच्छ महाविहार श्रीबहाःपाखें नेपाल राष्ट्रिय ज्ञानमाला समितिया न्हूगु ज्यासना पुचःयात भिंतुना देछासे हनेगु ज्या जुल । लिसें उगु हे ज्याझ्वलय् उपसमितिया यल जिल्ला क्षेत्रीय उपसमिति नं गठन याःगु खः । महाविहारया व्यवस्थापनय् जिल्लाया स्वीन्यागू ज्ञानमाला भजन खलःयापाखें गुम्हेसियागु नेपाल राष्ट्रिय ज्ञानमाला समिति यल जिल्ला क्षेत्रीय उपसमिति गठन याःगु खः । श्री बच्छ महाविहार ज्ञानमाला भजन खलःया नायः रत्नबहादुर शाक्यया सभापतित्वय् जूगु ज्याझ्वलय् मूपाहांकथं झायादीम्ह समाजसेवी नापं पुलांम्ह मन्त्री बुद्धिराज वज्राचार्यं राजनीतिक परिवर्तन हयाः जनतायात स्वतन्त्रता बीत २००७ सालय् जूगु क्रान्ति सफल यायेत ज्ञानमाला भजनं नं तिबः बिउगु खँ लुमंकादिल । समितिया नायः रमना श्रेष्ठं संगठनयात क्वातुका यंकेत यलय् क्षेत्रीय उपसमिति गठन जूथें आः मेमेगु थासय् नं उकथं हे उपसमिति गठन याना वनेगु जुइ धयादिल ।

समितिया संरक्षक प्रा. सुवर्ण शाक्यं बुद्धं शिक्षाया गुणगान यायेगु व चित शुद्ध यानाः शील पालना यायेगु हे ज्ञानमाला भजन खः धयादिल । ज्याझ्वलय् समितिया महासचिव इन्द्रमुनि शाक्यं क्षेत्रीय उपसमितिया नीति, नियम कनादीगु खः ।
समितिया यल जिल्ला क्षेत्रीय उपसमितिया संयोजकय् लक्ष्मीबहादु महर्जन (सिद्धार्थ ज्ञानमाला भजन खलः) व सहसंयोजकय् कुमार महर्जन–सुवर्ण छत्रपुर ज्ञानमाला भजन खलः) च्वनादीगु दुसा दुजलय् रामगोपाल श्रेष्ठ, नन्दगोपाल महर्जन, भीमवज्र वज्राचार्य, जया ताम्राकार, रमेश महर्जन, काजीरत्न शाक्य च्वनादीगु दु । नगां व श्री बच्छ ज्ञानमाला भजन खलःपाखें ज्ञानमाला भजन नं न्ह्यब्वःगु ज्याझ्वलय् मुनाभूषण शाक्यं सुभाय् देछानादीगु खः ।