नेपालभाषा शैक्षिक ज्वलंत सफ्टवेयरय्

येँ : नेपालभाषाया शैक्षिक ज्वलंत इन्टरनेटं डाउनलोड यानाः ब्वने फइ कथं सफ्टवेयर दयेकेत बिहिवाः छगू सहलह ज्याझ्वः जूगु दु ।
सम्मुन्नत नेपाल व वल्र्ड एजुकेशन नेपालया मंकाः ग्वसालय् न्ह्याःगु “डाइलेक्ट माय्पिंग वर्कशप अन नेपालभाषा” ज्याझ्वलय् च्वमि रास जोशी, नेपालभाषा अभियन्ता देवदास मानन्धर, बिष्णु चित्रकार लिसें थीथी ब्वनेकुथिया स्यनामिपिंसं ब्वति काःगु खः । ज्याझ्वलय् नेपाः दुनेया थीथी थासय् च्वंपिं नेवाःतय्सं ल्हाइगु नेपालभाषाया भाषिकायात कयाः नं दुग्यंक सहलह ब्याकेगु ज्या जूगु खः ।
सहलहया क्वःछिना कथं भाषिका नक्साङ्कनया लिधंसाय् नेपालभाषाया शैक्षिक ज्वलंत तयार जुइगु खँ वल्र्ड एजुकेशनया सीमा आचार्यं कनादीगु दु । उगु नक्साङ्कनय् येँ व यलय् न्ववाइगु भाषिकायात न्हापांगु प्राथमिकताय् तयेगु खँय् ब्वति काःपिं सकस्यां सहमति बिउगु खः ।
नेपालभाषा ब्वंका वयाच्वंपिं स्यनामिपिनि ग्वाहालि कयाः उगु ज्वलं तयार यायेगु व थ्वहे दँया मार्च इन्टरनेट मार्फत निःशुल्क डाउनलोड याये फइगु खँ नं मय्जु आचार्यं कनादिल ।