नेपाल लिपि गुथिया बुदिं हन

येँ- नेपाल लिपि गुथिया ३८ क्वःगु बुदिं हना नापं दँ मुँज्या गुथिया ज्याकू साःननि शनिवाः जुल । गुथिया नायः निरञ्जन ताम्राकारया नायःसुइ छ्याञ्जे पबित्र कसालं ज्याझ्वः न्ह्याकुसें संस्थां यानावयाच्वंगु दच्छिया ज्याखँया प्रतिवेदनं न्ह्यब्वयादीगु खःसा ल्याःचाःया प्रतिवेदन दांभरिं उत्तम साय‍्मिं न्ह्यब्वयादीगु खः ।

गुथिपाखें लिपि स्यनेज्या जूगुलिइ नेपाल लिपि कक्षाय् सुयोग्य रत्न ताम्राकार न्हाप, आनन्द कुमार महर्जन ल्यू, सुनिता डंगोल लियांल्यू लाःगु खः । अथेहे रञ्जना लिपिया कक्षाय् आनन्द कुमार महर्जन न्हाप, सुनिता डंगोल व सुयोग्य रत्न ताम्राकार ल्यू, लुमिन ताम्राकार व सृष्टि श्रेष्ठ लियांल्यू लाःगु खः । निक्वःगु रञ्जना लिपि कक्षाय् बिद्या सागर तुलाधर न्हाप, सदिक्षा शाक्य ल्यू, प्रमिला ताम्राकार व अनुसूया मानन्धर लियांल्यू लाःगु खः । ज्याझ्लय् लिपि कक्षाय् ताःलापिंत पाहाँ नेपालभाषा टाइम्सया सम्पादक सुरेश किरण मानन्धरं दसिपौ लःल्हानादीगु खः ।

राज्यया दमनया हुनिं प्रविधिया विकास नापनापं लिपिया नं विकास इलय् हे यायेमफुगुलिं झीगु लिपिया विकास छझाः ल्यूने लाःगु खःसानं आः उगु प्रविधि छ्यलाबुलाय् हयेफुपिं नेवाःत दयावःगुलिं नेपाल लिपियात युनिकोडय् दुथ्याकेगु लगायत ट्वीटर मार्फत विश्वव्यापिकरण यायेगु पाखे पलाः न्ह्याःगु दु । थुकियात अझ स्यल्लाक्क धिसिलाक निरन्तर न्ह्याःवनेत सकसिनं ग्वाहालि यायेमाःगु खँ लिपि गुथिया न्वकू अनिल स्थापितं कनादिल ।