
येँ(नेपालभाषा टाइम्स)- नेपालभाषा आन्दोलनया न्ह्यलुवानापं दबू प्याखंया अतिकं नांजाःम्ह कलाकार, निर्देशक गणेश साय्मियात तःजिक हनेज्या याःगु दु । शनिवाः थनया नेपाः ब्यांक्वेटय् जूगु तःजिगु ज्याझ्वःया दथुइ भाषासेवी साय्मियात हनेज्या याःगु खः ।
गणेश साय्मि हना समितिया ग्वसालय् जूगु ज्याझ्वलय् मूपाहां नेपालभाषा मंकाः खलःया नायःलिसें जनकवि दुर्गालाल श्रेष्ठं सम्मानित व्यक्तित्व गणेश साय्मियात हनापौ देछासे हनेज्या यानादीगु खः ।
विशेष पाहां नेपालभाषा एकेदमिया भाइस चान्सलरलिसें नेवाः न्ह्यलुवा मल्ल के. सुन्दर व समितिया नायः नांजाःम्ह कलाकार राजेन्द्रमान शाक्यं बेतालिं चिकादीगु खः । नेवाः परम्पराकथं ख्यें सगं बियाः मूपाहां जनकवि श्रेष्ठं साय्मियात दोसल्लां न्ययेकाः हनापौ देछानादीगु खःसा समितिया नायः शाक्यं छगू लख न्हय्न्याद्वः तका दां लःल्हानादीगु खः ।
ज्याझ्वलय् केन्द्रीय मानन्धर संघ, थँहिति मानन्धर गुथि, नील पद्म लुमन्ति कोष, नेपालभाषा मंकाः खलः, पलिस्था, उदाय समाज, ब्याँचुलि सांस्कृतिक पुचः, धर्मचक्र तःननि खलः, इन्द्रेणी सांस्कृतिक समाजलिसें आपालं खलः, पुचलं हनापौ देछाःगु खः । लिसें भाषा, साहित्य, संगीत, संकिपा आदि थीथी ख्यःया व्यक्तिपिंसं नं खादा क्वखायेकाः, मतिनाया चिं देछानाः वय्कःयात भिंतुना देछानादीगु खः । लोककवि राजभाई जकःमिं भिंतुना चिनाखँ न्यंकादीगु ज्याझ्वलय् नांजाःम्ह संगीतज्ञ अमरराज शर्मां गणेश साय्मिया सम्मानय् चिनादीगु भिंतुना म्येँ न्ह्यब्वयादीगु खः ।
येँ महानगरपालिकाया प्रवक्तानापं १७ वडाअध्यक्ष नविन मानन्धरं सकसिगुं प्रतिनिधित्व यासे भिंतुना न्वचु तयादीगु ज्याझ्वलय् विशेष पाहां नेवाः न्ह्यलुवालिसें समितिया सल्लाहकार मल्ल के. सुन्दरं नेवाः अधिकार प्राप्तिया आन्दोलनय् गणेश साय्मिं बियादीगु योगदानायात कयाः नुगः खँ तयादीगु खःसा पाहांकथं झायादीम्ह ख्यालिजुजु मदनकृष्ण श्रेष्ठं नं नुगःखँ तयादीगु खः ।
ज्याझ्वलय् मूपाहां जनकवि दुर्गालाल श्रेष्ठ, सम्मानित व्यक्तित्व गणेश साय्मिं नं नुगःखँ तयादीगु खः । समितिया नायः शाक्यया सभापतित्वय् वय्कलं हे लसकुस यासें न्ह्याःगु ज्याझ्वलय् समितिया दुजः सुरेश किरण मानन्धरं सम्मानित व्यक्ति साय्मिया म्हसीका न्ह्यब्वयादीगु खः ।
जनगायक भृगुराम श्रेष्ठ, नेवाः देय् दबूया नायः पवित्र वज्राचार्य, नेवाः न्ह्यलुवा राजेन्द्र श्रेष्ठ, संस्कृतिविद् डा. चुन्दा वज्राचार्य, बागमति प्रदेशसभा सदस्य शैलेन्द्रमान वज्राचार्य, नांजाःम्ह कलाकार आशाकाजी थकू पाहांकथं झायादीगु ज्याझ्वलय् समितिया दुजः सत्यनारायण डंगोलं सुभाय् देछानादीगु खः ।
थ्व स्वयां न्ह्यः सम्मानित व्यक्तित्व साय्मियात धल्कोस्थित वय्कःया छेँनिसें नेपाः ब्यांक्वेटतक सांस्कृतिक बाजंसहित लसकुस यानाः यंकूगु खः ।
LEAVE YOUR COMMENTS