ने. सं. ११४३ चौलाथ्व सप्तमी -

सरकारं सीपिनि ल्याः सुचुकूगु द्वपं

स्वास्थ्य मन्त्रालय व सेनां कोरोनां सीपिं धकाः बिउगु ल्याः फरक

येँ (नेपालभाषा टाइम्स) – नेपालय् कोरोना भाइरसं सीपिनि ल्याः सरकारं सुचुकूगु खँ पिहां वःगु दु। स्वास्थ्य मन्त्रालय व नेपाली सेनां पितबिउगु सीपिनि ल्याखय् फरक पिहां वयेवं सरकारं कोरोनां सीपिं मनूतय् ल्याःयात सुचुकूगु द्वपं लाःगु खः ।

सरकारं कोरोना संक्रमणया कारणं सीपिनि सीम्ह व्यवस्थापन यायेगु ज्या नेपाली सेनायात बियातःगु दु। नेपाली सेनां वंगु शुक्रवाः तक थःपिंसं ८८९ म्ह सीपिनि सीम्ह व्यवस्थापन यायेधुनागु विवरण सार्वजनिक याःगु दु। तर स्वास्थ्य मन्त्रालयं न्हियान्हिथं प्रेस ब्रिफिङ यायेगु झ्वलय् धाःसा शुक्रवाः तक मुक्क ७१५ म्ह कोरोना संक्रमणं सीगु विवरण सार्वजनिक याःगु दु ।

निगू सरकारी ज्याकू मन्त्रालय व सेनाया विवरण हे फरक पिहां वयेवं सामाजिक सञ्जाल निसें थीथी सञ्चार माध्यमं सरकारं कोरोनां सीपिनि ल्याः सुचुकूगु धकाः द्वपं बियाहःगु खः । सीपिनि विवरण थथे फरक पिहां वयेवं मन्त्रालय व सेनाया अधिकारीतय्सं छुं कारणं फरक वःगु धयागु पत्ता लगे यायेत स्वयाच्वनागु खँ धाःगु दु ।

निगू निकायया विवरण फरक वयेवं कोभिड १९ संकट व्यवस्थापनया निंतिं दयेकातःगु उच्चस्तरीय समितिं नं चिउताः प्वंकाः विवरण रुजु यायेगु सुरु यानागु खँ धाःगु दु। शुक्रवाः निगू निकायं सार्वजनिक याःगु तथ्यांकय् १७४ म्ह सीपिनि ल्याः फरक खनेदुगु खः । सेनाया प्रवक्ता सन्तोष वल्लभ पौडेलं शव व्यवस्थापनय् प्रत्यक्ष रुपं सहभागी जुइगु सेनाया ईकाइपाखें छ्वयाहःगु विवरणया आधारय् सेनाया तथ्यांक सार्वजनिक यानागु खँ धयादीगु दु ।

नेपाली सेनाया थीथी पृतना शव व्यवस्थापनया ज्या याना वयाच्वंगु दु। प्रवक्ता पौडेलं थःपिंसं सीपिनि नां, थर, मेमेगु खँया आधारय् युनिटं छ्वयाहःगु कथं तथ्यांक तयातयागु खँ धयादीगु दु। वय्कलं आः फरक वःगु विषययात कयाः स्वास्थ्य मन्त्रालयलिसे खँ ल्हानाच्वनागु धयादीगु दु। वय्कलं सेनां पितबिउगु तथ्यांकय् कोभिड १९ जुइधुंकाः आत्महत्या याःपिं, बेवारिस सीम्ह, सीधुंकाः कोरोना पुष्टि जूपिनि ल्याः नं दुथ्याःगु, तर थज्याःगु ल्याः यक्व मदुगु खँ धयादीगु दु ।

मेखे स्वास्थ्य मन्त्रालयया प्रवक्ता डा. जागेश्वर गौतमं मन्त्रालयं नं आः निगुलिं निकायया तथ्यांक रुजु यायेगु ज्या न्ह्याकेधुनागु खँ धयादीगु दु। बिबिसीलिसे खँ ल्हासें वय्कलं धयादीगु दु, ‘वय्कःपिंसं गुकथं तथ्यांक तयादिल स्वयेमाल नि, कोरोनाया जक हिसाब यानादिल कि मेगु नं यानादिल, थ्व भेरिफाइ यानाच्वंगु दु मन्त्रालयं ।’

वय्कलं सेनां कोरोना संक्रमण कारणं सीपिं मखुपिनि नं शव व्यवस्थापन याःगुलिं उमिगु नं नां दुथ्याकातःगु जुइमाः धासें रुजु यायेगु ज्या न्ह्यानाच्वंगु खँ धयादिल ।