लण्डनय् पद्मरत्न लुमंकल

येँ – पासा पुचः गुथि यूके लण्डन व एसओएएस नेपाल सोसाइटीया मंकाः ग्वसालय् बेलायतया राजधानी लण्डनय् पद्मरत्न तुलाधर लुमंकेगु ज्या जुल । अनया एसओएएस युनिभर्सिटीइ उगु ज्याझ्वः जूगु खः । बेलायतया निंतिं नेपाःया राजदूत तेजेन्द्र रेग्मीं नुगःखँ तसें शुरु जूगु उगु ज्याझ्वलय् बेलायतया नेपाःविद् डा. डेविड गेल्नरं ‘पद्मरत्न ः मछाःम्ह नेता’ धइगु विषयय् न्ववानादीगु खः ।

अथे ज्याझ्वलय् नेपाःपाखें मल्ल के. सुन्दरं नुगःखँ तयादीगु खःसा लिसें सजना महर्जन, शशि महाजु, कृष्ण चखुं, डा. सचेतन तुलाधर, सुवास थेबे, ओजेश सिं व ग्वसाः खलःपाखें पासा पुचः गुथि यूके लण्डनया नायः संयुक्त श्रेष्ठपिंसं भाजु तुलाधरया राजनीति, भाषा–जाति आन्दोलन, जनजाति आन्दोलन, मानव अधिकार आन्दोलनया पक्ष लिसें आः वय्कः मदयेधुंकाः नेवाः आन्दोलन गुकथं न्ह्याइ धइगु विषयय् तकं चर्चा यानादीगु खः ।