ने. सं. ११४६ बछलागा चौथी -

स्वनिगःया नेवाःतय्सं गुथि विधेयक च्याकाः विरोध, कन्हय् १२ बजे धर्ना

येँ – सरकारं हःगु गुथि व्यवस्था सम्बन्धी न्हूगु विधेयक विरुद्ध स्वनिगःया नेवाःतय्सं सतक आन्दोलन याइगु जूगु दु । उकिया सांकेतिक ज्याझ्वः कथं थौं येँया माइतीघर मण्डलाय् छगू स्वस्फूर्त धर्ना ज्याझ्वः यायेत्यंगु दु ।
थौं न्हिनय् १२ बजे निसें १ बजे तक माइतीघर मण्डलाय् थीथी ब्यानर ब्वयाः थ्व धर्ना ज्याझ्वः यायेत्यंगु खः । थुकी थौंकन्हय् सक्रिय जुयाच्वंगु थीथी नेवाः आन्दोलनया दुजः कार्यकर्तातय्सं ब्वति काइसां थुकिया ग्वसाः धाःसा स्वतन्त्र रूपं जूगु खँ सीदुगु दु ।

ज्याझ्वलय् थीथी खलः पुचःतय्सं थःथःपिनि संस्थाया ब्यानर लिसें गुथि विधेयक विरुद्ध थीथी नारा च्वयातःगु पप्म्लेट आदि ज्वना वइ । थ्व धर्ना ज्याझ्वलय् त्रिविविया पुलांम्ह उपकुलपति डा. केदारभक्त माथेमा लिसें उगु विधेयक विरुद्ध सक्रिय जुयादीम्ह अभियन्ता भरत जंगमपिंसं नं ब्वति कयादीगु खँ सीदुगु दु । लिसें थौंकन्हय् सक्रिय जुयाच्वंपिं सम्पदा, सतक विस्तार, सार्वजनिक जग्गा आदि आन्दोलनया अभियन्तातय्सं नं ब्वति काइगु खँ धाःगु दु ।

थ्व स्वयां न्ह्यः वंगु शुक्रवाः स्वनिगःया नेवाःतय्सं येँया धल्को दुवातय् गुथि विधेयक च्याकेगु ज्या याःगु खः । अन हे स्वतःस्फुर्त रुपं पिहां वःगु छगू जुलुसं धल्कोय् थ्यंकाः विधेयक च्याकेगु ज्या याःगु खः । उकी नेवाः देय् दबूया नायः नरेश ताम्रकार, नेवाः न्ह्यलुवा डा. महेशमान डंगोल, नेवाः पत्रकार राष्ट्रिय दबूया नायः श्रीकृष्ण महर्जनं मि तयादीगु खः । वकुन्हु हे नेपाः ब्यांक्वेटय् जूगु उगु विधेयक सम्बन्धी अन्तक्र्रिया ज्याझ्वलय् गुथि संस्थानया अध्यक्ष मीनराज चौधरीं विधेयक बारे न्ववासें यदि थ्व विधेयक पारित जुल धाःसा थुकिं नेवाःतय्गु गुथिगाना फुक्क हे ध्वस्त याइगु खँ कनादीगु खः । विधेयक पनेगु लागिं गुथि संस्थानं यक्व हे कुतः यानागु खःसां सांसदतय्सं जबर्जस्ती यानाच्वंगु द्वपं नं वय्कलं बियादिल ।

उगु हे अन्तक्र्रियाय् नेवाः न्ह्यलुवा डा. महेशमान श्रेष्ठ, नेवाः देय् दबूया नायः नरेश ताम्राकार, पत्रकारपिं सुरेश किरण मानन्धर, श्रीकृष्ण महर्जन लगायत थीथी अभियन्तातय्सं नुगःखँ प्वंकुसें विधेयक रोके यायेगु खःसा आः सतक आन्दोलन बाहेक मेगु विकल्प मदुगु खँ कनादीगु खः । थुगु विधेयकयात कयाः थौं हे सुथय् ज्यापु महागुथि नेपाः येँ महानगर समितिया बैठक च्वनेत्यंगु दु । लिसें थौं हे नेवाः देय् दबूपाखें नं छगू बैठक सःतातःगु दु ।