मुस्लिम पर्वय् विदाया माग

येँ – मुस्लिम आयोगं मुस्लिम सांस्कृतिक पर्वय् सार्वजनिक बिदा बीमाःगु माग यासें प्रधानमन्त्री केपी शर्मा ओलीयात ध्यानाकर्षण पौ लःल्हाःगु दु । आयोगया छगू पुचलं म्हिगः प्रधानमन्त्री निवास बालुवाटारय् प्रम ओलीयात नापलानाः मुस्लिम समुदायया महत्वपूर्ण धार्मिक व सांस्कृतिक पर्व ईदुलफित्र (ईद), ईदुल अज्हा (बकर ईद) मोहम्मद जयन्तीइ राष्ट्रिय सार्वजनिक विदा व्यवस्था यायेत इनाप याःगु खः ।

ध्यानाकर्षण पतिइ सार्वजनिक बिदाया व्यवस्था मिले यायेत आयोगया विसं २०७५ चैत ११ गतेया निर्णय कथं गृह मन्त्रालययात इनाप याना छ्वःगु खःसा उकिया निर्णय न्ह्यःने न्ह्याः मवंगुलिं प्रधानमन्त्रीं हे माःगु पहल यायेत इनाप यानातःगु दु ।

ध्यानाकर्षण पौ लःल्हानाःकासें प्रधानमन्त्री ओलीं मुस्लिम सांस्कृतिक पर्वय् सार्वजनिक बिदा बीगु बारे वइगु मन्त्रिपरिषद्या बैठकय् सहलह यानाः निर्णय यायेगु प्रतिबद्धता प्वंकादीगु दु ।

आयोगया अध्यक्ष समिम मियाँ अन्सारीं नेपाःया सविधानं हे धार्मिक स्वतन्त्रता लिसे बहुधार्मिक व बहुसांस्कृति विशेषतामूलक देय्या रुपय् स्थापित यायेधुंकूगु सन्दर्भय् सरकारं सार्वजनिक बिदा बीमाःगु माग यानादीगु खः ।

सम्बन्धित बुखँ

LEAVE YOUR COMMENTS