‘फुटपाथ पसः चिइकेगु ज्या दीर्घकालिन जुइ’

येँ (नेपालभाषा टाइम्स)- येँ महानगरपालिकां सतक सिथं निर्वाध रुपं न्यासि वनेगु लँजुवाःतय्गु अधिकार जूगु खँ धयादीगु दु । बिहीवाः छगू विज्ञप्ति जारी यासें येँ महानगरपालिकां सतक सिथं निर्वाध न्यासि वनेगु लँजुवाःतय्गु अधिकार स्थापित याकेत येँमनपां न्ह्याकूगु ज्या आंशिक रुपय् मखुसे पूर्ण दीर्घकालीन रुपय् न्ह्याकेगु खँ धाःगु खः ।

येँ महानगरपालिकाया प्रवक्ता नवीन मानन्धरं हस्ताक्षर यानाः पितबिउगु विज्ञप्तिइ सतकय् तयातःगु फुटपाथ पसः चीकेगु ज्या पर्व विशेष वा मेगु कारणं स्थगित वा लचिलो मजुइगु खँ नं धयातःगु दु । फुटपाथ व्यापारयात मोहनि नखःलिसे स्वानाः प्रकाशन व प्रसारण जूगु समाचारप्रति थःगु ध्यानाकर्षण जूगु धासें सतकय् लँजुवाःतय्गु न्हापांगु अधिकार जूगु खँ नं धयातःगु दु ।

विज्ञप्तिइ धयातःगु दु, ‘लँजुवाःतय्गु अधिकार स्थापित याकेत महानगरपालिकां थःगु नीति तथा कार्यक्रम तर्जुमा याःगु दु, शहरया विकास, सुधार व समृद्धिया निंतिं कानुनं बिउगु अधिकार कार्यान्वयन यानाः नागरिक जीवनय् सुधारया महसुस याकेगु जिमिगु प्रतिवद्धता कायम दु ।’

उकथं हे शहरी सुन्दरता कायम याकेगु थेंज्याःगु विषययात येँ मनपां नीतिगत व्यवस्था कार्यान्वयनया नितिं ज्याझ्वः न्ह्याकाच्वनागु खँ नं धयातःगु दु । उकथं हे विज्ञप्तिइ आर्थिक दँ २०७९÷८० या वार्षिक नीति अन्तर्गत पूर्वाधार विकास सम्बन्धी नीतिइ लँजुवाःतय्गु सहज आवागमनया निंतिं फुटपाथया उपयोग अपुइकेगु विषय न्ह्यथनातःगु खँ नं धयातःगु दु ।

येँ महानगरपालिकां येँया थीथी थासय् तयातःगु फुटपाथ पसः चीकेगु अभियान न्ह्याकाच्वंगु दुसा गुलिखे थासय् देगः हे त्वपुइक तयातःगु पसः नं चीकेगु ज्या यानाच्वंगु दु । उकथं हे थीथी थासय् अतिक्रमण यानाच्वंगु संरचना थुनेगु ज्या नं येँमनपां न्ह्याकाच्वंगु दु ।