स्वक्वःगु अन्तर्राष्ट्रिय जलरङ कला महोत्सव जुइगु
येँ(नेपालभाषा टाइम्स)-अन्तर्राष्ट्रिय जलरङ समाज नेपालं वइगु मंसिरय् अन्तर्राष्ट्रिय जलरङ कला महोत्सव याइगु जूगु दु । समाजं छगू पत्रकार सम्मेलन यासें वइगु मंसिरया निगूगु वाःपाखे उगु महोत्सव ग्वसाः ग्वयेगु घोषणा याःगु खः ।
समाजं नेपाःया ललितकला ख्यःया महत्वपूर्ण ज्याझ्वः राष्ट्रिय ललितकला ब्वज्या क्वचाःगु लगत्तै नेपालय् विदेशी कलाकारतय् सहभागिताय् ‘स्वक्वःगु अन्तर्राष्ट्रिय जलरङ कला महोत्सव’ ग्वसाः ग्वयेगु घोषणा याःगु खः । समाजया अध्यक्ष एनबी गुरुङं मंसिर १६ निसें २० न्यान्हुयंकं महोत्सव यायेगु घोषणा यासें महोत्सवय् सहभागिताया निंतिं आवंनिसें हे देश, विदेशया कलाकारतय्त औपचारिक रुपं आह्वान नं यानादीगु दु ।
‘महान् प्राचीन सभ्यता स्वनिगः’ शीर्षक बियाः जुइगु महोत्सवय् सहभागित जुइपिं कलाकारं स्वनिगःया हे शीर्षकय् चित्र सृजना यानाः ब्वज्याया निंतिं छ्वया हये फइगु समाजं धाःगु दु । स्वनिगःया महत्वपूर्ण धार्मिक, ऐतिहासिक, सांस्कृतिक व पर्यटकीय सम्पदा, कला, संस्कृतिया थप प्रचार प्रसार यायेगु व नेपाली कलाया विकास यायेगु मू उद्देश्य कयातःगु महोत्सवय् विश्वया ४० गू देय्या सत्या स्वयां अप्वः कलाकारया प्रत्यक्ष उपस्थितिइ स्वसः स्वयां अप्वः कलाकृतिया ब्वज्या जुइगु समाजं जानकारी बिउगु दु ।
समाजया महासचिव दीपेन्द्र बनेपालीं हनुमानध्वाखा, यल लाय्कू, ख्वप लाय्कू, तोखा, भुइजःसि आदि थासय् वनाः यथास्थानया चित्र च्वयेगु, कलाया प्रत्यक्ष ब्वज्या व कलासम्बन्धी अन्तक्र्रिया नं यायेगु ज्याझ्वः दुगु जानकारी बियादीगु दु ।
समाजं थ्व स्वयां न्ह्यः सन् २०१६ य् येँय व घान्द्रुक व सन् २०१८ य् येँय् व लुम्बिनी यानाः निक्वःतक थुकथंया अन्तर्राष्ट्रिय जलरङ कला महोत्सव याये धुंकूगु दुसा थगुने जक पोखरा, घ्याचोकय् नेपाः, भारत, बंगलादेश व इरानया कलाकारतय् सहभागिताय् ‘पोखरा आर्ट क्याम्प’ यायेधुंकूगु दु ।
LEAVE YOUR COMMENTS