शुरु जुल सगरमाथा आरोहण

विश्वया दकलय् तजाःगु च्वापुगुँ सगरमाथा आरोहण शुरु जूगु दु । थुगुसीया बसन्त ऋतुलिसें विश्वया दकलय् तजाःगु च्वापुगु गुँ सगरमाथा (८,८४८ मिटर) आरोहण शुरु जूगु खः । सगरमाथा आरोहणया निंतिं च्याम्ह शेर्पा आरोहीं खिपः प्यनेगु (रोप फिक्सिंग)या झ्वलय् सगरमाथा च्वकाय् थ्यनेवं आरोहणया निंतिं लँपु खुल्ला जूगु खः ।

खिपः प्यनेगु (रोप फिक्सिंग)लिसें सगरमाथाया न्हापांगु आरोहण शुरु जूगु पर्यटन विभागं न्ह्यथंगु दु । विभागया महानिर्देशक दिनेश भट्टराईनं च्याम्ह आरोही सगरमाथाया च्वकाय् थ्यंगु प्रारम्भिक जानकारी वःगु धयादिल । सगरमाथा आधार शिविर (बेस क्याम्प)य् च्वँच्वनादीम्ह सम्पर्क अधिकृत ज्ञानेन्द्र श्रेष्ठया कथं आइतवाः न्हिनसिया ३ः३० ताः इलय् शेर्पा आरोहीतय्सं लँ दयेकेगु झ्वलय् सगरमाथाया च्वकाय् थ्यंगु खः ।

थुकियालिसें थुगुसीया सगरमाथाया न्हापांगु आरोहण सफल जूगु दु । थ्व इलय् आपालं आरोहीत अनुकूल मौसमया निंतिं नं पियाच्वंगु दु । बेस क्याम्प स्वयां च्वय् जक निसः स्वयां अप्वः आरोही दुगु व थौं मंगलवाः तकया दुने सत्याम्ह आरोही सगरमाथाया च्वकाय् थ्यनीु अनुमान जुयाच्वंगु सम्पर्क अधिकृत श्रेष्ठं कनादिल ।

‘आपालं आरोहीत सगरमाथा च्वकाया लिक्क क्याम्प–४य् थ्यने धुंकूगु दु । आः धमाधम समिटय् वनीगु जुइ । दकलय् अप्वः आरोहीत थौं मंगलवाः हे च्वकाय् थ्यनीगु अनुमान यानागु दु’ वय्कलं धयादिल । थुगुसी सगरमाथा आरोहणया निंतिं मौसम अनुकूल खने दुगुलिं आरोहण उत्साहजनक जुइगु श्रेष्ठया धापू दु ।

सगरमाथा च्वकाय् थ्यंपिं शेर्पा आरोहीइ पासाङ तेञ्जिङ शेर्पा, पासाङ दावा शेर्पा, लाक्पा तेन्डी शेर्पा, जीनजेन लामा, सिद्धिबहादुर तामाङ, पेम्बाछिरि शेर्पा, तेञ्जिङ ग्याल्जेन शेर्पा व डेटुक भोटे खः । इपिं च्याम्हं शेर्पा हिमालयन गाइड नेपाल ट्रेक एण्ड एक्सपीडिसन प्रालिपाखें वंपिं खः । इपिंं सगरमाथाया सफल आरोहण यानाः लिहां वयेगु क्रमय् दुगु व क्याम्प–२ लय् थ्यंकः वइगु कम्पनीया प्रबन्ध निर्देशक ईश्वरी पौडेलं कनादिल ।

थगुने लँपुया कारणं आरोहणय् छुं भचा ढिलासुस्ती जूगु खःसां थुगुसी धाःसा इलय् हे लँपु चाःगुलिं आरोहण उत्सापूर्ण जुइगु अनुमान यानातःगु दु । थ्व हे दथुइ सगरमाथालिसें थुगुसी ८,०९१ मिटर तजाःगु अन्नपूर्ण हिमालया नं सफल आरोहण जुल । दक्षिण कोरियाली नागरिक होङ विन किमया पुचलं अन्नपूर्ण हिमालया सफल आरोहण याःगु खः ।

आरोहीया किमया लिसें प्यम्ह शेर्पा नं अन्नपूर्णया च्वकाय् थ्यंकेत सफल जूगु दु । पिछुम्बी शेर्पा, ग्याल्जे शेर्पा, छिरिङ शेर्पा र निमा तेञ्जी शेर्पां अन्नपूर्णया सफल आरोहण यानादीगु खः । थुगुसीया सिजनय् छगू जक पुचलं (आरोहण दलं) अन्नपूर्ण हिमाल आरोहणया निंतिं अनुमति काःगु सम्पर्क अधिकृत श्रेष्ठं जानकारी बियादीगु दु ।

नेपाःया हिमाल आरोहण मध्ये अन्नपूर्ण हिमाल आरोहणया ल्याखं दकलय् थाकूगु हिमालया रुपय् कायेगु याः । पर्यटन विभागया कथं थुगु दँय् विश्वया दकलय् तजाःगु च्वापुगुँ सगरमाथा आरोहणया निंतिं ३८ गू पुचःया ३६४ म्ह आरोही गन्तव्यपाखे वंगु दु । उकी मध्ये प्यंगू पुचलय् नीम्ह नेपाःमि दुथ्यानाच्वंगु दु ।

थ्व स्वयां न्ह्यः थगुने बसन्त ऋतुया इलय् ४३ गू पुचलय् ३६६ स्वदेशी व विदेशी आरोहीं सगरमाथाया सफल आरोहण याःगु खः । अथे हे सन् २०१६ य् ३८ गू पुचःया ३०० स्वयां अप्वः आरोहीं सगरमाथाया च्वकाय् पलाः तयेत सफल जूगु खः ।