ने. सं. ११४४ कौलाथ्व पारू - नःलास्वनेगु

बाखं च्वमि श्रेष्ठया ‘समुन्द्र मन्थन’ पिदन

येँ(नेपालभाषा टाइम्स)- विराट नेपालभाषा साहित्य सम्मेलन गुथिया पुलांम्ह नायःलिसें वर्तमान सल्लाहकार बाखं च्वमि गोविन्दमान श्रेष्ठया चिबाखं मुना सफू ‘समुद्र मन्थन’या पितब्वज्या जुल । विराट नेपालभाषा साहित्य सम्मेलन गुथि व पलिस्था, येँया मंकाः ग्वसालय् जूगु ज्याझ्वलय् बाखं च्वमि श्रेष्ठया चिबाखं मुना सफूया पितब्वज्या याःगु खः ।

ज्याथाय् च्वंगु अन्नपूर्ण कलेजय् जूगु ज्याझ्वलय् मूपाहांकथं झायादीम्ह शिक्षाविद्लिसें वरिष्ठ बाखं च्वमि हितकरवीर सिंह कसां उगु बाखं सफूया चिखिफ्यनादीगु खः । सफू पितब्वज्या यासें वय्कलं बाखं च्वमि श्रेष्ठलिसेया स्वापू व वय्कःया बाखनय् दुगु विशेषतायात कयाः नुगःखँ तयादीगु खः ।

लिसें वय्कलं थौंकन्हय् नेपालभाषा साहित्यय् चिबाखं विधाय आपालं न्हूपिं च्वमिपिं खने दयाच्वंगुनापं चिबाखंनय् वयाच्वंगु हिउपाः व विशेषतायात कयाः नं थःगु धारणा तयादीगु खः ।

ज्याझ्वलय् पाहांकथं झायादीपिं नांजाःम्ह समालोचकलिसें च्वमि प्रा. नर्मदेश्वर प्रधानं, वरिष्ठ कवि डा. योगेन्द्र प्रधान, नेपालभाषा एकेदेमिया भाइस चान्सलर, उपन्यासकारलिसें नेवाः न्ह्यलुवा मल्ल के. सुन्दरं नं पितब्वज्या जूगु सफू, च्वमि श्रेष्ठया व्यक्तित्व व वय्कलं नेपालभाषा साहित्यया ख्यलय् बियादीगु योगदानया थीथी पक्षयात कयाः कुलादीगु खः ।

म्हं मफुगुलिं बाखं च्वमि श्रेष्ठ ज्याझ्वलय् उपस्थित जुयामदीवं वय्कलं वाचन यानादीगु बाखंया रेकर्ड न्यंकूगु खःसा ४३ पु बाखं दुथ्यानाच्वंगु सफुलिइ दुथ्याःगु छपु छपु बाखं नेपालभाषाया नांजाःम्ह उपन्यासकार शशिकला मानन्धर व रेणु श्रेष्ठं बाखं ब्वनाः न्यंकादीगु खः ।

सफूया द्यबः च्वयेगुलिसें थीथी कथं ग्वाहालि यानादीपिंत मतिनाया चिं व बाखं च्वमि श्रेष्ठयापाखें ग्वसाः खलःयात सुभाय् पौ लःल्हाःगु ज्याझ्वलय् बाखं च्वमि श्रेष्ठया छेँजःपाखें निगूत्या लख दां विराट गुथिया छेँया निंतिं वय्कःया जहान ईश्वरी श्रेष्ठं विराटया नायः महेन्द्रगोपाल कर्माचार्ययात लःल्हानादीगु खः ।

पलिस्था येँया नायः पूर्ण ताम्राकारया सभापतित्वय् न्ह्याःगु ज्याझ्वलय् विराट गुथिया नायः कर्माचार्यं लसकुस यानादीगु खः । बाखं च्वमि श्रेष्ठया थ्व निगूगु कृति खःसा थ्व स्वयां न्ह्यः वय्कःया ‘आस्थाया सिपाहीत’ (ने.सं. ११३३) चिबाखं सफू पिदनेधुंकूगु दु ।